MDB

Ana səhifə

MDB

Ermənistan hakimiyyəti AŞPA Monitorinq komitəsinin məruzəçilərindən səfərlərini təxirə salmağı xahiş edib

09 oktyabr 2010 04:55 (UTC +04:00)

Bakı-APA. Avropa Şurası Parlament Assambleyası (AŞPA) həmməruzəçilərinin Ermənistana bu ay üçün nəzərdə tutulmuş səfəri təxirə salınıb. APA-nın armtoday.info-ya istinadən verdiyi məlumata görə, bu barədə AŞPA-dakı Ermənistan nümayəndə heyətinin rəhbəri David Arutyunyan bildirib.

«İş ondadır ki, oktyabrın 19-21-i İrəvanda demokratiyanın gələcəyi mövzusunda forum keçiriləcək. Bu isə Avropa Şurasının keçirdiyi ən vacib tədbirlərdəndir. Lakin müddətlər gözlənilmədən dəyişdi və AŞPA baş katibi oktyabrın 20-də yüksək vəzifəli rəsmilərlə birgə görüşdə iştirak etməlidir. Ona görə də biz faktiki olaraq həmməruzəçilərin səfərinin təxirə salınmasını xahiş etməyə məcbur olduq. Əsas səbəb bizim həmməruzəçilərin səfərinə hazırlaşmağımız və mümkün qədər daha yüksək səviyyədə görüşlər təşkil etməyimizdir. Qrafikin dəyişməsi ilə həmməruzəçilərin səfərinin lazımi səviyyədə təşkil olunmasında bizim çətinliklərimiz əmələ gəldi», deyə Arutyunyan izah edib.

«Biz səfərin vaxtının dəyişdirilməsini xahiş etdik. Burada heç bir siyasi səbəb yoxdur, problem texniki xarakterlidir», deyə Arutyunyan bəyan edib.

Onun sözlərinə görə, həmməruzçilər çox yəqin ki, Ermənistana dekabr və yaxud gələn ilin yanvarında səfər edəcəklər.

Səfərin onun, yoxsa bütün nümayəndə heyətinin xahişi ilə təxirə salındığı barədə suala David Arutyunyan «mənim xahişimlə» cavabını verib.