MDB

Ana səhifə

MDB

Gürcüstanda təhsil nazirinin sabiq müavini həbs edilib

12 oktyabr 2010 16:47 (UTC +04:00)

Tiflis. Nizami Məmmədzadə - APA. Gürcüstan Baş Prokurorluğu Nəzarət Palatasının Təhsil və Elm Nazirliyi ilə birlikdə apardığı operativ-istintaq tədbirləri nəticəsində ölkənin keçmiş təhsil naziri Giya Nodiyanın müavini Aleksandr Çikvaidze saxlanılıb.

APA-nın Gürcüstan bürosunun məlumatına görə, bu barədə Gürcüstan Baş Prokurorluğu açıqlama yayıb.

Açıqlamada bildirilir ki, A.Çikvaidze nazir müavini işləyən zaman tanışı Tsira Cavaxişvilinin əli ilə “BLAZ” MMC-in direktoru Zurab Tsimakuridzedən 40 min lari rüşvət alaraq, əvəzində qanunu kobud şəkildə pozub və Zuqdidi rayonunda yerləşən Şamqoni açıq məktəbin təmiri üçün şirkətlə müqavilə imzalayıb. Müqavilədə görülən işlərə 900 min lari ayrılıb. Buna görə A.Çikvaidze nazirin xəbəri olmadan “BLAZ” MMC-nin hesabına 700 min ları köçürüb.

Z.Tsimakuridze özünü A.Çikvaidzenin himayəsində hiss edərək şirkətin hesabına köçürülən məbləğdən 500 min larini mənimsəyib, 200 min larini isə məktəbin reabilitasiyasına xərcləyib. Aparılan araşdırmalar nəticəsində Zurab Tsimakuridze və Tsira Cavaxişvili də saxlanılıb.

Bundan başqa, A.Çikvaidze “Yuni Bildinq” tikinti şirkəti ilə Msxeti rayonunun Misaktsieli açıq məktəbinin, eləcə də Qardabani və Senaki rayonlarında məktəblərin tikintisi üçün 1,8 milyon larilik müqavilə bağlayıb. Tikinti işlərini isə onun kürəkəni Elquca Çxeidze və Acarıstan Təbiəti Mühafizə Baş İdarəsinin rəhbəri Tenqiz Qoqoberidze yerinə yetirib. A.Çikvaidzenin himayəçiliyi və birbaşa təsiri ilə adı çəkilən şəxslər büdcəyə aid 600 min larini mənimsəyiblər. Cinayətin izini gizlətmək üçün A.Çikvaidzenin göstərişi ilə görülən tikinti işləri nazirin əmri yerinə yetirilmədən, yoxlamasız qəbul edilib.

Aleksandr Çikvaidze barəsində rüşvət alma və xidməti vəzifəsindən sui-istifadəyə görə Gürcüstan CM-nin 338-ci və 332-ci maddələrinə görə cinayət işi qaldırılıb. Cinayəti sübut olunarsa, onu 11 il azadlıqdan məhrumetmə cəzası gözləyir.