MDB

Ana səhifə

MDB

Rusiya taxıl ixracına qadağanın müddətini uzadıb

23 oktyabr 2010 12:02 (UTC +04:00)

Bakı. Əli Əhmədov – APA-Economics. Rusiya hökuməti ölkədən xaricə buğda ixracına qoyulan qadağanın müddətini 2011-ci il iyul ayının 1-dək uzadıb. Bu barədə baş nazir Vladimir Putin ölkədə kənd təsərrüfatı işlərinin yekunları ilə bağlı Rostovda keçirilən iclasda bildirib. «APA-Economics»in məlumatına görə, V.Putin bildirib ki, bu il ölkədə 60 mln. ton buğda yığılıb ki, bu da ölkənin tələbatını ödəməyə kifayət edəcək.

Xatırladaq ki, Rusiyadan taxıl ixracına qadağa quraqlıq və məhsul yığımının az olacağı barədə proqnozlarla əlaqədar olaraq avqustun 15-dən tətbiq olunub. Hökumətin qərarı ilə qadağanın müddəti 2010-cu ilin sonunda bitməli idi.

Qeyd edək ki, embarqonun müddətinin uzadılması barədə qərar bir qədər gözlənilməz olub. Çünki hələ sentyabrda Rusiya prezidenti Dmitri Medvedev istisna etməmişdi ki, əkin-biçinlə bağlı hesabatlardan sonra ixraca embarqo aradan qalxacaq.

Rusiya ötən kənd təsərrüfatı mövsümündə (2009-cu ilin iyulundan 2010-cu ilin iyulunadək) ölkədən xaricə 21,4 mln. ton buğda ixrac edib. Bir neçə gün əvvəl isə Rusiya Kənd Təsərrüfatı Nazirliyi quraqlığın iqtisadiyyata vurduğu ziyanın həcmini açıqlayıb. Bu hesabata görə, quraqlıq kənd təsərrüfatına 41,6 mlrd. rubl (1,4 mlrd. dollar) ziyan vurub. Quraqlıq ölkənin 43 vilayətin 893 rayonunda 25 035 təsərrüfata təsir göstərib.