MDB

Ana səhifə

MDB

İrəvan meri Ermənistan prezidentinin protokol xidmətinin əməkdaşını oğurlatdıraraq döyüb

08 dekabr 2010 16:42 (UTC +04:00)

Bakı - APA. Ermənistan prezidenti Serj Sarkisyan prezidentin protokol xidmətinin əməkdaşına hücum çəkən İrəvan meri Qagik Beqlaryanı sərt tənqid edib.

APA-nın “İnterfax”a istinadən xəbərinə görə, prezidentin mövqeyini onun mətbuat katibi Armen Arzumanyan çatdırıb.

“Prezident bu cür hadisələrlə bağlı mövqeyini bir neçə dəfə bildirib. Bu davranış qəbuledilməz və yolverilməzdir. Xüsusən də dövlət məmuru ilə bağlı” - deyə mətbuat katibi S.Sarkisyanın mövqeyini ifadə edib.

Xatırladaq ki, “Armenia Today” İrəvan merinin prezidentin protokol xidmətinin əməkdaşı Aram Kandayanı döyməsi barədə məlumat yayıb. Buna səbəb dekabrın 3-də dünya şöhrətli müğənni Plasido Dominqonun konsertində Q.Beqlaryanın xanımının prezidentlə yanaşı oturması səbəb olub. A.Kandayan prezidentlə yalnız ölkə rəhbərliyinə daxil olan şəxslərin yanaşı oturmasının mümkünlüyünü bildirərək, merin xanımından yerini dəyişməyi xahiş edib. Həyat yoldaşından bu haqda məlumat alan mer prezidentin protokol xidmətinin əməkdaşını “Metaks” fabrikinə apartdıraraq vəhşicəsinə döyüb.

Ermənistan prezidentinin mətbuat katibi Armen Arzumanyan isə deyib ki, Q.Beqlaryanın və A.Kandayanın iştirakı ilə kiçik insident baş verib: “Amma mətbuat hər şeyi şişirdib - nə adam oğurlamaq, nə də vəhşicəsinə döymək olmayıb”.

“İnterfax”ın İrəvan meriyasındakı mənbələrə istinadən yaydığı son xəbərə görə, Q.Beqlaryan vəzifəsindən istefa verib.