Media

Ana səhifə

Media

“RUH” Jurnalistləri Müdafiə Komitəsi: “Bu gün “Jurnalistlərin dostu” mükafatının təqdim edilməsinin kökündə sui-istifadə və plagiat dayanır”

24 iyul 2008 15:21 (UTC +04:00)

“Azərbaycanda “Jurnalistlərin dostu” mükafatının təsisçisi «RUH» Jurnalistləri Müdafiə Komitəsidir. Bununla bağlı bütün müəlliflik hüquqları quruma məxsusdur. Bu gün bəzi qurumların «Jurnalistlərin dostu» mükafatını təqdim etməsinin kökündə sui-istifadə və plagiat dayanır. Buna görə də Müəllif Hüquqları üzrə Dövlət Agentliyinə müraciət etmək niyyətindəyik”. Bunu APA-ya açıqlamasında “RUH” Azərbaycan Jurnalistləri Müdafiə Komitəsinin icraçı direktoru Əvəz Rüstəmov deyib. Onun sözlərinə görə, mükafatın verilmə qaydası Əsasnamədə əksini tapıb: “Qaliblər KİV və jurnalist təşkilatlarının rəhbərləri, rəsmi və müstəqil qurumların başçıları, mütəxəssislər arasında keçirilən sorğu nəticəsində müəyyənləşdirilir. Söz və mətbuat azadlığı prinsiplərini müdafiə edən vəzifəli şəxslər, ictimai və siyasi xadimlər mükafata layiq görülə bilərlər. Müxtəlif dövrlərdə ictimai-siyasi xadimlərdən Nazim İmanov, Sirus Təbrizli, Əli Kərimli, İsa Qəmbər və mərhum eks-prezident Heydər Əliyev bu ada layiq görülüb”.
Ə. Rüstəmov deyib ki, bəziləri “RUH”un mövqeyini ABŞ-ın Azərbaycandakı səfiri ilə bağlamaq istəyirlər: “Bu, məsələyə tamamilə yanlış, əsassız və qərəzli yanaşmadır. Xanım Ann Dersi həqiqətən ölkəmizdə medianın inkişafında maraqlı və ona hər zaman yardım etməyə çalışan insandır. O, daha böyük mükafatlara da layiqdir”.
“RUH”un icraçı direktoru “Media açarı” mükafatının təsisçiləri sırasından çıxmasına da aydınlıq gətirib: “RUH” Azərbaycan müstəqilliyini elan etdikdən sonra ölkədə yaranan ilk jurnalist təşkilatıdır. 1992-ci ilin mayından fəaliyyət göstərir. Bu təşkilatın jurnalistikanın inkişafındakı xidmətlərini heç kim dana bilməz. Öz işini təkcə jurnalistlərin hüquqlarının müdafiəsi ilə məhdudlaşdırmayan jurnalistlər üçün çoxsaylı vəsaitlər hazırlayıb, seminarlar, «dəyirmi masa»lar təşkil edib. Hazırda söz və mətbuat azadlığının vəziyyəti ilə bağlı aylıq monitorinqlər aparmaqdayıq. Bu yaxınlarda buraxmağı planlaşdırdığımız toplu 1997-2007-ci illərdə bu sahədəki vəziyyəti əhatə edəcək”.
Ə. Rüstəmov deyib ki, Əflatun Amaşov təşkilatın sədri postunu tərk etdikdən sonra onu bir neçə şəxs əvəzləyib: “ Sonuncu sədr Hüquq Salmanov hazırda Söz Azadlığını Müdafiə Fondunun icraçı direktoru kimi fəaliyyət göstərdiyindən işlərin aparılması müvəqqəti olaraq mənə həvalə edilib. Ümumiyyətlə, Mətbuat Şurasını çıxmaq şərtilə jurnalist təşkilatlarının əksəriyyətinin fəaliyyətində süstlük müşahidə olunur. Mövcud tendensiya «RUH»dan da yan ötməyib. Yəni, qurumun işində müəyyən zəifləmə var. Jurnalist təşkilatlarının fəaliyyəti əsasən media layihələrinin gerçəkləşdirilməsi, müəyyən monitorinqlərin keçirilməsi və sair bu kimi tədbirlərlə məhdudlaşır. Demək olar, eyni işi hər bir jurnalist təşkilatı görür. Burada fərqli məqam ortaya yalnız o zaman çıxır ki, bu təşkilatlardan hər hansı biri layihə əldə edir. Belə olduqda təbii ki, aktivlik artır. Ola bilər ki, «RUH» hazırda layihə gerçəkləşdirmədiyindən fəaliyyətində müəyyən durğunluq hiss olunur. Sabah vəziyyət dəyişə bilər və deyək ki, indi aktiv görünən hər hansı qurum sabah layihəsiz qalar. Bu o demək olacaqmı ki, həmin qurum fəaliyyət göstərmir?”
Qeyd edək ki, Siyasi və Mülki Müdafiə Mərkəzi bu gün Ann Dersiyə “Jurnalistlərin dostu” mükafatını verib. Bu mükafatı isə illər öncə “RUH” Jurnalistləri Müdafiə Komitəsi təsis edib.

Jurnalistlərin_dostu