Media

Ana səhifə

Media

Azərbaycanın media rəhbərləri mətbuatla bağlı imzalanan sənədləri müsbət qiymətləndirirlər

31 iyul 2008 15:45 (UTC +04:00)

Bakı. Elnur Məmmədli - APA. “Kütləvi informasiya vasitələrinin inkişafına dövlət dəstəyi Konsepsiyası keçid dövrünün problemlərini yaşayan medianın dirçəldilməsinə yönəlib. Sənəddə nəzərdə tutulan tədbirlər Azərbaycan mediasının iqtisadi baxımdan möhkəmlənməsinə xidmət edəcək”. Bu sözləri prezidentin bu gün imzaladığı KİV-in inkişafına dövlət dəstəyi Konsepsiyasını APA-ya şərh edən Mətbuat Şurasının sədri Əflatun Amaşov deyib. O, sənədin Azərbaycanda jurnalistikanın inkişafına təkan verəcəyini, mətbuatın iqtisadi durumu yaxşılaşdıqca, keyfiyyət dəyişikliyinin də müşahidə olunacağını söyləyib: “Konsepsiyanın həyata keçirilməsi jurnalistlərin peşəkarlıq səviyyəsinin inkişafına, onların sosial problemlərinin həllinə gətirib çıxaracaq. Prezidentin bir qrup KİV-ə maliyyə yardımı göstərilməsi haqqında sərəncamında isə 38 gündəlik qəzetə və informasiya agentliklərinə 5 min manat həcmində maliyyə yardımının edilməsi nəzərdə tutulur. Bu KİV-lərin siyahısı Mətbuat Şurası tərəfindən hazırlanıb. Biz çalışdıq ki, gündəlik qəzetlər bu siyahıya düşsün. Siyahını hazırlayarkən KİV-in jurnalistlərin peşə davranış qaydalarına necə əməl etdiyini də nəzərə almışıq”.

“Yeni Müsavat” qəzetinin baş redaktoru Rauf Arifoğlu da APA-ya açıqlamasında prezidentin bir sıra mətbu orqanlara 5 min manat məbləğində maliyyə yardımı ayırmasını müsbət qiymətləndirib: “Buna görə təşəkkür edirəm. Düzdür, daha böyük məbləğdə pul ayrılmasına Azərbaycan büdcəsinin imkanı çatır. Amma buna da şükür. Çünki mən bu mərhələdə iqtidarın mətbuata yönəlik hansısa müsbət addımlar atacağına inanmırdım. Arzu edirəm ki, bunun ardınca digər addımlar da atılsın, həbsdə olan jurnalistlər azadlığa buraxılsın, Azərbaycanın yazılı mətbuatının normal fəaliyyəti üçün bütün imkanlar yaradılsın”.

“Azərbaycan” qəzetinin baş redaktoru Bəxtiyar Sadıqov hər iki sənədin imzalanmasından sevinc duyduğunu açıqlayıb. Onun sözlərinə görə, Mətbuat Şurasının üzvləri və jurnalistlər uzun müddət idi ki, bu sənədlərin imzalanmasını gözləyirdilər: “Bu siyahıda həm iqtidar, həm müxalifət, həm də müstəqil KİV-lər var. Bu, sübut edir ki, dövlət başçısı Azərbaycanda söz və mətbuatın inkişafına qayğı göstərir. Əlbəttə, 5 min manatlıq yardım mətbuatın bütün problemlərini həll etmir. Amma əsas məsələ dövlətin ayrı-seçkiliyə yol vermədən mətbuata qayğısının nümayiş etdirilməsidir. İnanıram ki, bundan sonra Azərbaycan mətbuatı sıxıntıdan çıxacaq”.

“Bakı Xəbər” qəzetinin baş redaktoru Aydın Quliyev də imzalanan sənədləri müsbət qiymətləndirib. Onun fikrincə, birdəfəlik yardımın məbləği hamı tərəfindən birmənalı qarşılanmayacaq, bəziləri bunu az, bəziləri çox hesab edəcək: “Amma mən hesab edirəm ki, söhbət yardımın məbləğindən getməməlidir. Mahiyyət odur ki, prezident mətbuatın çətin durumunun və ona hər hansı səviyyədə kömək göstərməyin zəruriliyinin fərqinə varıb. Beş min manat məbləğində yardımın özü də o deməkdir ki, prezident mətbuatın yardıma ehtiyac duyduğunu görərək ilk addımı atıb. Konsepsiyanı isə mətbuat və hökumət münasibətlərində uzun müddətə hesablanmış böyük bir prosesin başlanğıcı kimi dəyərləndirirəm. Yəqin bu konsepsiyanın həyata keçirilməsinin real mexanizmləri də tətbiq olunacaq”.

“Ayna” qəzetinin baş redaktoru Elçin Şıxlı isə konsepsiyanın məzmunundan xəbərsiz olduğunu bildirib: “Mətbuat Şurasının İdarə Heyətinin üzvü kimi konsepsiyanın hazırlanması prosesində təkliflər vermişik. Amma bilmirəm o təkliflər qalır, ya yox. Ümumilikdə konsepsiyanın tərəfdarıyam. Beş min manat yardım ayrılması haqda isə yalnız onu deyirəm ki, bəy verən atın dişinə baxmazlar”.

APA-nın baş direktoru Vüsalə Mahirqızı da dövlət başçısının imzaladığı sərəncamları yüksək qiymətləndirdiyini bildirib. Ayrılan maliyyə yardımının və KİV-ə dövlət dəstəyi konsepsiyasının mətbuatın inkişafına müsbət təsir göstərəcəyinə ümidvar olduğunu deyən V. Mahirqızı sərəncamların mətbuatın tərəqqisində təkan rolu oynayacağını vurğulayıb. O, mediaya dövlət qayğısının davamlı olmasını arzuladığını da sözlərinə əlavə edib.

Azərbaycan_media