Media

Ana səhifə

Media

Azərbaycan Mətbuat Şurasının Şikayətlər üzrə Komissiyası 5 müraciətə baxıb

22 avqust 2008 15:41 (UTC +04:00)

Bakı – APA. Bu gün Azərbaycan Mətbuat Şurasının (MŞ) Şikayətlər üzrə Komissiyasının növbəti iclasını keçirib. Qurumdan APA-ya verilən məlumata görə, MŞ sədrinin müavini Umud Rəhimoğlunun rəhbərlik etdiyi komissiya 5 müraciətə baxıb.
İclasda Bakı Şəhər Baş Polis İdarəsinin «Exo» qəzetində gedən «Etoloqiya dorojnoy poliçii» («Yol polisinin etologiyası») sərlövhəli yazı ilə bağlı şikayəti araşdırılıb. Qəzetin təmsilçisi məqalənin nəşrin «Toçka zreniya» («Nəzər nöqtəsi») rubrikasında getdiyini deyərək yazının nəşrin yox, müəllifin mövqeyi olduğunu vurğulayıb. Lakin onun nəzərinə çatdırılıb ki, «Kütləvi informasiya vasitələri haqqında» qanununda və media ilə bağlı digər hüquqi aktlarda materialın yayımlandığı KİV rəhbərinin məsuliyyəti barədə konkret maddələr var. Komissiya qəzetin «Azərbaycan Jurnalistlərinin Peşə Davranışı Qaydaları»nın tələblərini pozduğu rəyinə gəlib və «Exo» qəzetinə materialla bağlı qarşı tərəfin mövqeyini əks etdirən məktub vermək, üzr istəmək tövsiyə olunub.
BŞBPİ-nin «Təzadlar» qəzetinin 5-12 avqust 2008-ci il tarixli sayında dərc edilmiş «Polislə fahişələrin işbirliyi» sərlövhəli yazı ilə əlaqədar müraciətinə baxılarkən də məqalənin bir sıra etik prinsiplərə sayğısızlıqla təqdim olunduğu göstərilib. Araşdırmanın dolğun aparılmaması orada Bakı polisi ilə bağlı bir sıra yanlış fikirlərin yer tapmasına, AJPDQ-nın tələbinin pozulmasına səbəb olub.
Komissiyanın iclasında «Reportyorların Azadlıq və Təhlükəsizlik İnstitutu» İctimai Birliyinin 2 nəşrdə gedən yazılarla bağlı şikayətinə baxıb. İyunun 28-də istər «Hürriyyət» («Emin Hüseynov həqiqətən döyülüb?») və istərsə də «Gündəlik Bakı» qəzetində («Emin Hüseynli növbəti «qurban» rolunda») gedən yazılarda AJPDQ-nın tələbinin pozulduğu göstərilib. İclasda tərəflər arasında yaranmış anlaşmaya uyğun şəkildə hər iki KİV-ə növbəti saylarında RATİ sədri E.Hüseynovun mövqeyini əks etdirən yazı vermələri tövsiyə olunub.
Komissiya «Azadlıq» qəzetinin «Oliqarx məmurlar YAP-ı ələ keçirirlər» (22 iyul 2008) və «YAP-da pul davası» (25 iyul 2008) sərlövhəli yazılarda AJPDQ-nın tələblərinin pozulması barədə rəy çıxarıb.

Mətbuat_Şura_Şikayət_Komissiya