Media

Ana səhifə

Media

İsmayıl Ömərov: “Biz heç kim üçün vasitə ola bilmərik” - MÜSAHİBƏ

İsmayıl Ömərov: “Biz heç kim üçün vasitə ola bilmərik” - <font color=red>MÜSAHİBƏ</font>

29 avqust 2008 11:19 (UTC +04:00)

Bakı. Elbrus Seyfullayev - APA. Bu gün İctimai Televiziya və Radio Yayımları Şirkətinin yaradılmasından 3 il ötür. Bu münasibətlə APA şirkətin baş direktoru İsmayıl Ömərovdan müsahibə alıb.

- Bu gün İctimai Televiziyanın fəaliyyətə başlamasından üç il ötür. Ötən müddət ərzindəki fəaliyyətinizi necə qiymətləndirirsiniz?

- Üç ildə İctimai Televiziyanın hansı səviyyədə fəaliyyət göstərdiyini Azərbaycan cəmiyyətindən və ziyalılarından soruşmaq lazımdır. Hesab edirəm ki, cəmiyyətin İctimai Televiziyadan razılığı var. Baş direktor kimi kollektivin formalaşdırılması, maddi texniki bazanın qurulması, verilişlərin rəngarəngliyi, proqram siyasətinin təşkil olunması baxımından xeyli dərəcədə peşəkarlaşmış, dünya televiziya sistemindən bəhrələnməyə can atan və bəhrələnmiş bir kanal qurmağa nail olmuşuq. Bu özündən razılıq deyil. Biz həmişə verilişlərimizi müzakirə edəndə tərif əvəzinə tənqidi qeydlərimizi diqqətə çatdırırıq. Sadəcə olaraq, böyük yükün altına girmişik, ayrı cür işləməyə haqqımız yoxdur. Başqa televiziya kanallarının dara düşəndə bəhanə yerləri var. Bizim isə buna haqqımız yoxdur. Əsas uğurlarımız hələ qabaqdadır.

- Maddi-texniki bazanız tam təmin olunub?

- Dünyanın ən aparıcı telekanalları da deyə bilməz ki, onlar maddi-texniki baza ilə tam təmin olunub. Bu sahədə daim yeniləşmələr gedir. Biz elə texniki avadanlıqlar almaq istəyirik ki, uzun ömürlü olsun. Biz Azərbaycan teleməkanında xeyli dərəcədə fərqli və üstün texnikaya malik televiziya kanalıyıq. Bizdə olan studiyalar, onların texniki təminatı inanmıram ki, Azərbaycanda başqa hansısa kanalda olsun. Bütün bunlar dövlətin qayğısından irəli gəlir.

- Ötən il İTV-nin büdcəsi ilə bağlı narahatçılığınız yaranmışdı. Bu məsələni necə həll etdiniz?

- 2007-ci ildə belə bir narahatçılıq olub. Ancaq elə bir ciddi problemlər yaşamadıq. Bu il büdcəmiz normaldır. Yəqin gələn il də normal olacaq. Bu mənada bizim gileylənməyə haqımız yoxdur.

- İTV fəaliyyətə başlayanda maraqlı layihələrlə çıxış etsə də, sonradan bu layihələrin efirə getməsi bir qədər səngidi. Bunun səbəbi nədir?

- Uzun ömürlü layihələr çox az olur. Televiziya daim yeni layihələr tələb edir. Layihələr nə qədər maraqlı və cəlb edici olsa da, bir müddətdən sonra tamaşaçı ondan doyur. İndi bizim ən böyük marağımız beynəlxalq layihələrə üstünlük verməkdir. Biz müxtəlif ölkələrlə telekörpülər yaratmaq istəyirik. Yaxın günlərdə başlayacaq “Eurovision junion”la məşğuluq. Bundan başqa, növbəti “Eurovision” yarışmasına hazırlaşırıq. Bütün bu işlər çox böyük əziyyət tələb edir.

- Kollektivdən razısınız?

- Əsas odur ki, kollektiv məndən razı olsun. Mən bir dəfə demişəm ki, ən böyük layihəm bu kollektivdir. Mən onların intellekti və peşəkarlığı ilə fəxr edirəm.

- Uzun müddət efirdə olan jurnalist kimi baş direktoru olduğunuz İTV-də hansısa layihə ilə çıxış etmək fikriniz yoxdur ki?

- Əgər kasadlıq olsaydı eləyəcəkdim. Yeni başlayanda belə bir fikrim var idi ki, əgər ictimai-siyasi verilişlərin aparıcılığı cəhətdən dara düşsək, özüm veriliş aparım. Amma bizim belə bir çətinliyimiz olmadı. Bizdə heç bir veriliş bir nəfərdən asılı deyil. Hər verilişin alternativ aparıcısı və müəllifləri var.

- O vaxt demişdiniz ki, Azərbaycanda jurnalist kollektivinə ən yüksək məvacibi İTV verir. İndi vəziyyət necədir?

- Biz yenə də ən yüksək məvacib veririk. Beynəlxalq təşkilatların, səfirliklərin və dövlət qurumların köməkliyi ilə bizim İTV əməkdaşları ən çox xarici səfərlərə gedən kollektivdir. Bundan başqa, biz kollektiv üçün Quba rayonunda böyük bir istirahət mərkəzi tikmişik. Bu günlərdə onun açılışı olacaq. Əməkdaşlarımız rahat şəkildə gedib orada öz ailələri ilə istirahət edə biləcəklər. Biz həmin istirahət mərkəzində Mətbuat Şurası üçün də yer ayırmaq fikrindəyik. Bu şuranın xətti ilə digər həmkarlarımız da gedib həmin istirahət mərkəzində dincələ biləcəklər.

- İTV cəmiyyətdə və siyasi qüvvələr arasında balansı necə qoruyur?

- Biz Azərbaycan jurnalistikasında yeni bir demokratik təsisat qurmaq istəyirik. “İctimai Televiziya haqında” qanunda 9 bənddən ibarət nəzərdə tutulan iş prinsipini pozmaq haqqımız yoxdur. Bütün siyasi qüvvələr İTV-ni öz evi bilir. Bir iki nəfər nəsə danışırsa, özləri bilər.

- Bəzi müxalifət partiyalarının liderləri İVT-yə dəvət olunmur...

- Siz bu sırada adı çəkilən bir nəfəri göstərin.

- Əli Kərimli, İsa Qəmbər...

- Əli Kərimlinin də, İsa Qəmbərin də istənilən tədbirini yüksək səviyyədə işıqlandırmışıq. Hələ onların elə bir tədbiri olmayıb ki, biz onu operativ şəkildə yüksək mədəniyyətlə efirə verməyək. Sadəcə olaraq, bəzi siyasi qüvvələr balans söhbətlərini xatırlatmaqla özlərinin siyasi passivliyini bizim ekran vasitəsiilə aktivləşdirmək iddiasındadırlar. Biz heç kim üçün vasitə ola bilmərik. Onlar istənilən vaxt bizim efirimdən çıxış edə bilərlər. İTV-də olan “Yekun” verilişinin ekspertləri arasında Sülhəddin Əkbər, Qabil Hüseynli, Rasim Musabəyov kimi şəxslər var. Biz heç kəsə fərq qoymuruq, millətimizə nə lazımdırsa onu da efirə veririk. Tədbirlərini az işıqlandırdığımıza görə Yeni Azərbaycan Partiyası da bizi ittiham edir. Nə vaxt Əli Əhmədovu, Siyavuş Novruzovu bayaq adını çəkdiyim şəxslər qədər efirdə görübsüz?

- Azərbaycanda keçiləcək prezident seçkisində namizədlərin pulsuz təbliğatı İTV-də həyata keçiriləcək. Buna hazırlığınız hansı səviyyədədir?

- Biz məsuliyyətimizi dərk eləyirik. Seçkini heç bir tərəfə əyilmədən, yüksək səviyyədə obyektiv və operativ şəkildə işıqlandıracağıq. Artıq seçki ilə əlaqədar xüsusi studiya yaratmışıq. Hesab edirəm ki, heç bir tərəfin tənbehinə tuş gəlməyəcəyik.

- İTV-nin baş direktoru kimi səlahiyyət müddətiniz nə vaxt başa çatır?

- Gələn il.

- Yenidən bu vəzifəyə namizədliyinizi verəcəksiniz?

- Mənim bir iş yerim olub - televiziya. Belə görürəm ki, ömrümün axırına kimi televiziyada işləyəcəyəm.