Media

Ana səhifə

Media

Sabah Bakıda Asiya və Sakit Okean Ölkələri Xəbər Agentlikləri Təşkilatının İcraiyyə Komitəsinin iclası başlayır

01 sentyabr 2008 13:04 (UTC +04:00)

Bakı – APA. Sentyabrın 2-də Bakıda “AzərTAc” dövlət agentliyinin ev sahibliyi ilə Asiya və Sakit Okean Ölkələri Xəbər Agentlikləri Təşkilatının - OANA-nın İcraiyyə Komitəsinin “Qloballaşan dünyada informasiya hamı üçün” mövzusunda 30-cu iclası keçiriləcək. APA-nın məlumatına görə, “AzərTAc”-ın baş direktoru Aslan Aslanov toplantıya OANA-nın prezidenti, İndoneziyanın “Antara” agentliyinin baş icraçı direktoru Əhməd Muxlis Yusuf, o cümlədən 21 ölkənin milli informasiya qurumlarının rəhbərləri və yüksək vəzifəli təmsilçiləri, eyni zamanda Avropa Xəbər Agentlikləri Alyansının (EANA) prezidenti, Avstriyanın APA agentliyinin baş direktoru Volfqanq Vislozilin qatılacağını bildirib.

“AzərTAc”-ın 2004-cü ilin sentyabrından OANA-nın üzvü olduğunu qeyd edən A. Aslanovun sözlərinə görə, Azərbaycan MDB məkanında xəbər agentliyi bu nüfuzlu regional qurumda təmsil olunan dördüncü ölkədir: “Həmin vaxtdan “AzərTAc”-ın informasiyaları OANA-nın xüsusi saytında yerləşdirilir, bu informasiyalardan təşkilatın üzvü olan digər 32 ölkənin 38 informasiya agentliyi istifadə edə bilir. 2007-ci il dekabrın 12-də İndoneziyanın paytaxtı Cakartada OANA-nın 13-cü Baş Assambleyasında “AzərTAc” bu qurumun rəhbər orqanının - İcraiyyə Komitəsinin büro üzvü seçilib. İcraiyyə Komitəsinin hazırkı iclasının Bakıda keçirilməsi barədə qərar da həmin vaxt qəbul olunub”.

“AzərTAc”-ın 2008-ci il aprelin 18-də isə EANA-ya üzv qəbul edildiyini söyləyən baş direktor postsovet məkanında İTAR-TASS və “Ukrinform”dan sonra “AzərTAc”-ın bu quruma üzv qəbul edilmiş üçüncü informasiya agentliyi olduğunu bildirib. Bundan başqa, “AzərTAc” digər regional informasiya qurumlarının - Türkdilli Xəbər Agentlikləri Birliyinin (TKA), MDB-nin üzvü olan ölkələrin Milli İnformasiya Agentlikləri Assosiasiyasının (ANİA), Qara Dəniz İqtisadi Əməkdaşlıq Təşkilatının üzvü olan ölkələrin Milli İnformasiya Agentlikləri Assosiasiyasının (BSANNA) üzvü və təsisçilərindən biridir.

OANA İcraiyyə Komitəsinin Bakıda keçirilən iclasının çox mühüm mövzuya həsr olunduğunu qeyd edən A. Aslanov qloballaşma və inteqrasiya proseslərinin geniş vüsət aldığı müasir dünyada hər bir kəsin informasiya almaq imkanının olmasının artıq zərurətə çevrildiyini vurğulayıb: “Xüsusilə bəşəriyyətin siyasi qarşıdurmalar, terrorizm, separatizm, dini ekstremizm, transmilli cinayətkarlıq kimi təhlükələrlə üzləşdiyi bir vaxtda obyektiv, qərəzsiz informasiyaya daha çox ehtiyac var. Məhz belə informasiya ala bilmək imkanı insanlara təkcə öz ölkələrində deyil, həm də bütün dünyada baş verən hadisələri doğru-düzgün qiymətləndirməyə kömək edir. Bu isə son nəticədə xalqların və ölkələrin bir-birini daha yaxşı tanımasına, onların yaxınlaşmasına xidmət edir. Hesab edirəm ki, bu cür beynəlxalq tədbirlər peşəkar fikir mübadiləsi baxımından çox faydalıdır. Ümidvaram ki, OANA İcraiyyə Komitəsinin iclası çox geniş bir coğrafiyanı əhatə edən ən müxtəlif ölkələrin xəbər agentlikləri arasında əməkdaşlıq əlaqələrinin genişlənməsinə öz töhfəsini verəcək”.

OANA_Azərbaycan