Azərbaycan paytaxtında “Qloballaşan dünyada informasiya hamı üçün” mövzusunda tədbir keçirilir

Azərbaycan paytaxtında “Qloballaşan dünyada informasiya hamı üçün” mövzusunda tədbir keçirilir
# 02 sentyabr 2008 09:40 (UTC +04:00)
Bakı. Laçın Sultanova-APA. Bu gün Bakıda Asiya və Sakit Okean Ölkələri Xəbər Agentlikləri Təşkilatı (OANA) İcraiyyə Komitəsinin “Qloballaşan dünyada informasiya hamı üçün” mövzusunda 30-cu iclası başlayıb. APA-nın məlumatına görə, tədbirə “AzərTAc” dövlət agentliyi ev sahibliyi edir. Tədbirdə çıxış edən “AzərTAc”-ın baş direktoru Aslan Aslanov iclasın Bakıda keçirilməsi haqqında qərarın OANA-nın 2007-ci il dekabrın 12-də İndoneziyanın paytaxtı Cakartada keçirilmiş 13-cü Baş Assambleyasında qəbul olunduğunu deyib.

O, tədbir iştirakçılarına inkişaf edən Azərbaycan, onun ən ağrılı problemi olan Dağlıq Qarabağ münaqişəsi haqqında ətraflı məlumat verib, Azərbaycanın bu münaqişəni sülh yolu ilə həll olunmasını istədiyini, Ermənistanın bu məsələdə qeyri-konstruktiv mövqe tutduğunu bildirib və bəyan edib ki, dünya ictimaiyyəti Ermənistana təzyiq göstərməli, beynəlxalq hüquq bərpa olunmalıdır.

«Azərbaycan tolerantlığı ilə tanın bir ölkədir», deyən A. Aslanov Azərbaycanın Şərqdə ilk demokratik respublika olduğunu, burada 135 il əvvəl ilk teatrın, 100 il əvvəl isə ilk operanın yarandığı qeyd edib. O, Azərbaycanda KİV-in vəziyyəti, sayı, senzuranın ləğvi, rəhbərlik etdiyi agentlik barədə məlumat verib.

Sonra Prezidentin İcra Aparatının Siyasi təhlil və informasiya təminatı şöbəsinin müdiri Elnur Aslanov prezident İlham Əliyevin tədbir iştirakçılarına müraciətini oxuyub.

Tədbirdə OANA-nın prezidenti, İndoneziyanın «Antara» agentliyinin baş icraçı direktoru Əhməd Müxlis Yusif, Türkiyə, Rusiya, Yaponiya, Çin, İran, Koreya, Malayziya, Qazaxıstan, Qırğızıstan, Vyetnam, Qətər, Küveyt, Suriya, BƏƏ, Yəmən və digər ölkələrin nüfuzlu informasiya agentliklərinin, o cümlədən Avropa Xəbər Agentlikləri Alyansının (EANA) prezidenti, Avstriyanın APA agentliyinin baş direktoru Volfqanq Vislozil, Fransanın “Frans-Press” agentliyinin yüksək vəzifəli təmsilçiləri iştirak edir. İclas sabah işini davam etdirəcək.
#
#

ƏMƏLİYYAT İCRA OLUNUR