Media

Ana səhifə

Media

Elnur Aslanov: “Media dünyanı şəffaf sistemə çevirib”

02 sentyabr 2008 11:42 (UTC +04:00)

Bakı. Tamara Qriqoryeva-APA. “Bizim xəbər agentliklərimizin lider olması üçün ümumi strategiya formalaşdırmalıyıq”. APA-nın məlumatına görə, bu fikirləri İndoneziyanın “Antara” agentliyinin baş icraçı direktoru Əhməd Muxlis Yusuf Bakıda keçirilən Asiya və Sakit Okean Ölkələri Xəbər Agentlikləri Təşkilatının konfransında söyləyib. O, informasiya agentlikləri arasında əməkdaşlığın vacib olduğunu vurğulayıb: “Bizim işdə əməkdaşlığın möhkəmləndirilməsi çox vacib məsələdir. Bu işə quruma üzv olan hər bir agentlik öz töhfəsini verməlidir”. Konfransda çıxış edən Avstriyanın APA agentliyinin rəhbəri, Avropa Xəbər Agentlikləri Alyansının (EANA) prezidenti Volfqanq Vislozil qeyd edib ki, görüşün əsas mövzularından biri – internet faktoru və informasiyanın internetdə yayılmasının sürəti ilə bağlıdır: “İyirmi birinci əsrdə müstəqillik məsələsi çox vacibdir, müstəqillik dedikdə isə ilk növbədə informasiya əldə etmək azadlığı nəzərdə tutulur”. Tədbirdə çıxış edən Prezidentin İcra Aparatının Siyasi təhlil və informasiya təminatı şöbəsinin müdiri Elnur Aslanov qeyd edib ki, qloballaşan cəmiyyətdə informasiyanın rolu artır: “Media dünyanı şəffaf sistemə çevirib. Azərbaycanda söz azadlığına xüsusi diqqət yetirilir. Prezident İlham Əliyev dəqiqliklə ifadə edib ki, azad medianın inkişafı dövlətimiz üçün əsas faktorlardan biridir”.