Media

Ana səhifə

Media

Mətbuat Şurası iki millət vəkili və prezidentliyə keçmiş namizədin “Xural” qəzeti ilə bağlı müraciətini müzakirə edib

31 oktyabr 2008 14:23 (UTC +04:00)

Bakı-APA. Bu gün Azərbaycan Mətbuat Şurası İdarə Heyətinin növbəti iclası keçirilib. Şuradan APA-ya verilən məlumata görə, iclasda prezidentin 31 iyul 2008-ci il tarixli sərəncamına əsasən yaradılması nəzərdə tutulan Kütləvi İnformasiya Vasitələrinə Dəstək Fondu ilə bağlı fikir mübadiləsi aparılıb. Şura sədri Əflatun Amaşov bildirib ki, mətbuatın iqtisadi inkişafının təmin olunmasında mühüm funksiya yerinə yetirəcək fondun Əsasnaməsinin və digər yardımçı sənədlərinin hazırlanması başa çatmaq üzrədir. Bu sənədlərlə bağlı həm Prezidentin İcra Aparatında, həm də Azərbaycan Mətbuat Şurasında iş aparılır.
İclasda həmçinin “Qaya” Mətbuat Yayımının köşklərinin bərpasına yardım edilməsi ilə bağlı müraciətinə baxılıb. Şura üzvləri məsələyə kompleks yanaşılmasının vacibliyini vurğulayıblar. İclasda qeyd olunub ki, eyni problemlə “Azərmətbuatyayımı” və “Qasid” firmaları da qarşılaşıb. Məsələnin araşdırılması və Bakı şəhər İcra Hakimiyyəti ilə iş aparılması üçün Şuranın Mətbuatla dövlət qurumları arasında problemlərin həlli Daimi Komissiyasına müvafiq təlimatlar verib.
İdarə Heyəti Uşaqların Hüquqları üzrə QHT Alyansının müraciətinin müzakirəsində müxtəlif cinayətlər törətmiş, yaxud zorakılığa məruz qalmış yeniyetmələrlə bağlı məsələlərin işıqlandırılmasında müvafiq tələblərin gözlənilməsi məqsədilə KİV-ə tövsiyələr verilməsini zəruri sayıb.
İclasda həmçinin millət vəkilləri, Bütöv Azərbaycan Xalq Cəbhəsi Partiyasının sədri Qüdrət Həsənquliyev və Böyük Quruluş Partiyasının sədri Fazil Qəzənfəroğlunun “Xural” qəzeti ilə bağlı Şuraya ünvanladıqları müraciətlərə baxılıb. Müraciət edənlər qəzetin 19-25 oktyabr 2008-ci il tarixli sayında dərc olunmuş yazılarda şərəf və ləyaqətlərinin təhqirinə yönələn ifadələrin yer aldığını bildiriblər. Nəşrin təmsilçisi iradlara münasibət bildirərkən mətbu yazılarda etik prinsiplərlə bir araya sığmayan ifadələrin işlədilməsi yolverilməz olduğunu özü də söyləyib. O, “Xural” qəzetinin Mətbuat Şurasının bu istiqamətdə çıxaracağı qərarın icrasına hazır olduğunu deyib.
Mətbuat Şurası faktı pisləyərək, qəzetin üzr istəyərək, təkzib dərc etməsini tövsiyə edib.