Media

Ana səhifə

Media

“İdeal” qəzetinin fəaliyyəti ilə bağlı ölkə rəhbərliyinə müraciət olunub

03 noyabr 2008 09:53 (UTC +04:00)

Bakı. Elnur Məmmədli – APA. “Azəri-Türk” Qadınlar Cəmiyyətinin sədri Tənzilə Rüstəmxanlı, xalq artisti Brilyant Dadaşova və daha bir neçə tanınmış şəxs “İdeal” qəzeti və eyniadlı jurnalla bağlı ölkə prezidenti İlham Əliyevə, Heydər Əliyev Fondunun prezidenti Mehriban Əliyevaya, milli təhlükəsizlik naziri, daxili işlər naziri və baş prokurora müraciət ediblər. APA-nın məlumatına görə, müraciətə imza atan şəxslər bu gün mətbuat konfransı keçiriblər. Konfransda çıxış edən Tənzilə Rüstəmxanlının sözlərinə görə, o həmişə ailəsi ilə birgə azad sözə təzyiqlərə qarşı çıxış edib: “Lakin jurnalistikadan kənar bir qrup şəxsin bu ada ləkə gətirdiyini, əxlaqsızlıqla məşğul olduğunu görərək, həmin şəxslərə qarşı mübarizə aparmaq missiyasını öz üzərimə götürmüşəm”.

T. Rüstəmxanlı “İdeal” qəzeti və onun təsisçisi Nazim Quliyevin Azərbaycana düşmən olan xarici və daxili qüvvələr tərəfindən idarə olunduğunu vurğulayıb: “Bu şəxsin rəhbəri olduğu qəzetdə və jurnalda həmişə Azərbaycanın düşmənlərinə qarşı mübarizə aparaq şəxslər təhqir olunur, böhtana məruz qalır. O öz qəzetində PKK lideri Abdulla Öcalanı qəhrəman kimi qələmə verir və Azərbaycan qadınlarını təhqir edir. Bu gün Azərbaycan jurnalistlərinin maddi durumunun hansı vəziyyətdə olduğu hər bəllidir. Amma Nazim Quliyev ən yüksək imkanlara malikdir. Mən xüsusi xidmət orqanlarına müraciət edirəm ki, həmin şəxsin arxasında dayanan qüvvələr araşdırılsın. O iki dəfə həbs edilib, cəzası başa çatmamış amma hansısa görünməyən əl onu həbsdən azad edib”. T. Rüstəmxanlı Azərbaycanın tanınmış şəxslərinin “İdeal” qəzetində təhqir olunmasında yalnız ermənilər və PKK-nın maraqlı olduğunu vurğulayıb.

Xalq artisti Brilyant Dadaşova isə bildirib ki, o heç vaxt tənqidlərə qarşı olmayıb: “Jurnalistlər tənqid yazmalıdırlar ki, millətin gözü açılsın. Amma bu qəzetdə davamlı olaraq tanınmış şəxslərə qarşı böhtanlara yol verilirsə, burada başqa maraqlar var. Özü də bu, şəxsi maraqlar deyil”.

Qeyd edək ki, ölkə rəhbərliyinə edilən müraciətdə Nazim Quliyevlə bağlı ciddi araşdırılmanın aparılması və onun arxasında dayanan qüvvələrin aşkar edilməsi xahiş olunur.