Media

Ana səhifə

Media

Xəbər lideri

16 noyabr 2008 09:04 (UTC +04:00)

Dörd il əvvəl Azərbaycan mətbuatında güclü kataklizm yaşandı. Media cəbhəsində hər şey öz axarında gedərkən, heç kimin gözləmədiyi anda meydana yeni informasiya agentliyi çıxdı. Bəziləri bundan sevindi, bəziləri kədərləndi, bəziləri hətta şok keçirdi. Əksəriyyət isə bu agentliyin ötəri bir şey olduğunu, az sonra onun da digər mətbuat orqanları kimi arxivə göndəriləcəyini düşündü. Amma bu agentliyi araya-ərsəyə gətirənlərin iddiası başqaydı – ölkənin xəbər məkanında birinci olmaq. İddia böyük idi, ağır zəhmət, yuxusuz gecələr, tükənməz enerji, yorulmaz insanlar tələb edirdi. Amma bu böyük iddia iddia olaraq qalmadı, zaman-zaman gerçəkləşdi, irəlilədi... Beləcə, bu gün Azərbaycan xəbərçiliyinin liderinə çevrilən APA yarandı.

Xəbərçilik yaxşı şey deyil. Ağlımız kəsəndən hər kəs bizə bunu anlatmağa, beynimizə bunu yeritməyə çalışır. Amma bəzilərinin taleyi elə gətirib ki, onlar xəbərçiliyi özlərinə peşə seçiblər. APA isə xəbərçilikdə müsbət elementləri ortaya qoydu, lazım olan anda naqislikdən nəcibliyə çevrilmənin mümkünlüyünü sübuta yetirdi. APA mətbuat ailəsinə daxil olması ilə çox şeyi dəyişdi, çox yeniliklər elədi. Ən əsası isə həmkarlarını, rəqiblərini oyatdı. APA-nın meydana çıxması ilə mətbuat düşərgəsində bir canlanma yarandı, uzun illər adı olub, fəaliyyəti görünməyən media qurumları, agentliklər, xəbər portalları hərəkətə gəldi. Artıq hər kəs üçün Azərbaycan mətbuatında bir rəqib vardı – APA. Bəziləri bu rəqabətdə sağlam yol tutdu, bəziləri isə xəbər məkanındakı məğlubiyyətini həzm edə bilmədiyindən müəyyən məqamlarda arxadan zərbə vurmaqdan, düşmənçiliyə əl atmaqdan belə çəkinmədi. Ancaq APA-nı belə şeylərlə sarsıtmaq mümkün deyildi. Çünki o, sağlam sütunlar, güclü çiyinlər üzərində qurulmuşdu. Özünü qəbul etdirdi, hər kəsi onunla hesablaşmaq məcburiyyətində qoydu... Dürüstlüyü, obyektivliyi, səmimiliyi ilə...

APA mənim üçün sözlə ifadə edilməsi mümkün olmayan çox doğma bir şeydir. Onu ancaq övladla müqayisə etmək olar. Övlad valideynin gözü qarşısında necə böyüyürsə, APA da mənim gözlərim qarşısında eləcə boy atır, inkişaf edir. İndi mənim APA-mın 4 yaşı var. Hər hansı mətbuat orqanı üçün 4 il elə də böyük tarix deyil. Amma mənim övladımın doğulduğundan bu günədək Azərbaycanın mətbuat tarixində etdiklərini inanmıram ki, dünyada hər hansı media orqanı 4 il ərzində öz ölkəsinin mətbuat tarixində etmiş olsun. Azərbaycan kimi məmləkətdə APA-nı yaratmaq və yaşatmaq çox böyük hünərdir. Digər çətinlikləri demirəm, təkcə APA-nın xəbərlərini aşkar-gizli oğurlayıb, üzdə isə onu bəyənmədiyini deyən “həmkarların”, sağlam rəqabətdən çəkinib, digər qara əməllərə üstünlük verənlərin münasibəti bu işin nə qədər ağır olduğunu göstərmək üçün yetərlidir, məncə. Hər nə qədər bizi bəyənmədiklərini, bizi qəbul etmədiklərini desələr də, onların içlərində APA-ya həsəd apardıqlarını bilirəm. Bilirəm ki, APA kimi operativ, tərəfsiz, obyektiv, iqtidarın da, müxalifətin də, cəmiyyətin bütün təbəqələrinin də qəbul etdiyi, etibar qazanmış bir mətbuat orqanı yaratmaq onların şirin xəyallarıdır. APA isə artıq xəyal deyil, gerçəklikdir.

Azərbaycana və bütün dünyaya operativ, təmənnasız, tərəfsiz xəbərlər çatdıran GERÇƏKİLİK... Bu gerçəkliyin yüzillərlə yaşamaq haqqı var...

APA_4