Media

Ana səhifə

Media

Tahir Məmmədov: “ATƏT-in prezident seçkilərində İctimai Teleradionun fəaliyyətinə verdiyi qiyməti obyektiv hesab edirik”

17 dekabr 2008 16:13 (UTC +04:00)

- Ötən gün ATƏT-in Demokratik Təsisatlar və İnsan Hüquqları Bürosu 2008-ci il oktyabrın 15-də Azərbaycanda keçirilmiş prezident seçkilərinin nəticələrinə dair yekun məruzəni açıqlayıb. Hesabatda İctimai Teleradionun fəaliyyəti barədə yazılan fikirlər Sizi qane edirmi?

- Ümumilikdə İctimai Teleradionun fəaliyyətinə verilən qiyməti obyektiv hesab edirik. Bilirsiniz ki, seçkiləri işıqlandıran əsas teleradio kimi İctimai Teleradio üzərinə düşən vəzifələri lazımınca yerinə yetirdi. Bu istiqamətdəki səylərimizin monitorinq qrupunun diqqətindən qaçmaması hesabatda aydın görünür.

- Bəs hesabatda Sizi qane etməyən fikirlər varmı?

- Bəli, var. Hesabatda İlham Əliyevə prezidentliyə digər namizədlərdən daha çox efir vaxtı ayrılması fikri yer alır ki, bunun da obyektiv səbəblərinə ATƏT rəsmiləri ilə keçirdiyimiz görüşlərdə dəfələrlə aydınlıq gətirmişik. Elə hesabatın özündə də ayrı-ayrı məqamlarda İctimai Teleradionun bu istiqamətdəki səyləri qeyd olunur. Məsələn, “İTV seçki kompaniyasına rəsmi start veriləndən sonra prezidentin fəaliyyətlərini xəbərlərdə az işıqlandırmaq üçün cəhd elədi” kimi bir fikir yer alıb. Hesabatın digər bir yerində isə qeyd olunur ki, İTV siyasi və xəbərlər proqramlarında prezidentin fəaliyyətini əks etdirən materiallara 16 % yer ayırıb. Təbii ki, həm seçki kampaniyası dövründə, həm də əvvəl prezidentin digər namizədlərlə müqayisədə fəaliyyətinin bundan dəfələrlə artıq olduğunu hamımız gözəl bilirik və bu rəqəmin özü göstərir ki, biz materialları maksimum qısa şəkildə təqdim etmişik. Cənab Herkelin özü ilə görüşdə də İctimai Teleradionun baş direktoru İsmayıl Ömərov ondan soruşdu ki, Sizin cənab Prezidentlə görüşünüzü bir xəbər kimi ictimaiyyətdən gizlətsək bu, ictimai yayım prinsiplərinə zidd olmazmı? Yəni İctimai Teleradio Prezidentin təbliğat xarakterli materiallarını yox, dövlət başçısı kimi fəaliyyətin işıqlandırıb.

- Hesabatla bağlı yerli KİV-lərdə müxtəlif səpkili xəbərlər öz əksini tapıb. Bəzən Sizin fəaliyyətiniz Dövlət Televiziyasının fəaliyyəti ilə eyniləşdirilir. Bu məsələyə münasibətiniz necədir?

- İctimai Teleradio ölkənin yeganə ictimai yayımçısıdır və bu cür müqayisələr qüsurludur. Hesab edirəm ki, belə ciddi bir sənədlə bağlı xəbər təhrif olunmamalıdır.