Media

Ana səhifə

Media

Azərbaycanın bir qrup xanım deputatı televiziyalarda milli-mənəvi dəyərlərə zidd verilişlərin yayımlanmasına etiraz sənədi qəbul etməyə hazırlaşır

27 dekabr 2008 09:21 (UTC +04:00)

Bakı. Elbrus Seyfullayev - APA. Azərbaycan Milli Məclisinin bir qrup xanım deputatı televiziyalarda milli-mənəvi dəyərlərə zidd verilişlərin yayımlanmasına etiraz sənədi qəbul etməyə hazırlaşır. Bu barədə APA-ya açıqlamasında millət vəkili Məlahət İbrahimqızı məlumat verib. Onun sözlərinə görə, yaxın günlərdə bir qrup xanım deputat mətbuat konfransı keçirərək, televiziyalardakı açıq-saçıqlığa öz etirazlarını bildirəcəklər.

Millət vəkili deyib ki, bu gün “Azərbaycan Televiziya və Radio” Verilişləri Qapalı Səhmdar Cəmiyyəti ilə İctimai Televiziya istisna olmaqla, televiziyaların böyük əksəriyyətində yayımlanan şou-proqramlarda kütləvi zövqsüzlük hökm sürür. M. İbrahimqızı televiziyaların vətənpərvərlik verilişləri yayımlamaq əvəzinə ucuz şou ardınca qaçmaqda ittiham edib: “Bu gün hər ikisi xalq artisti olan Flora Kərimova ilə Faiq Ağayev millətin gözü önündə bir-birlərinə qarşı heç bir əxlaq normasına sığmayan ifadələr səsləndirir, bunu bütün cəmiyyətə eşitdirirlər. Biz qadın millət vəkili kimi buna etiraz edir və bu tip verilişlərin yayımlanmasının qarşısının alınmasını istəyirik”.

Deputat Gültəkin Hacıbəyli də televiziyaların xalqın zövqünün formalaşmasında mənfi rol oynadıqlarını deyib. Millət vəkili yaranmış vəziyyətin milli-mənəvi dəyərlərin deqradasiyasına gətirib çıxardığını söyləyib: “Bəziləri televiziyalar bunu kommersiya maraqları ilə əlaqələndirirlər. Amma televiziyanı supermarketlə eyniləşdirtmək olmaz. Bugünkü Azərbaycan televiziyalarında şou-proqramlara baxan gənc nəsil milli-əxlaqi və İslam dəyərləri ruhunda tərbiyə ala bilməz. Onlar ancaq şit, bayağı və səviyyəsiz nümunələrlə rastlaşırlar. Televiziyalar millətin ideologiyasının formalaşmasında müstəsna rol oynadıqlarını unutmamalıdırlar”.

Qeyd edək ki, Milli Məclisin dünən keçirilən iclasında da deputatlar televiziyaların milli-mənəvi dəyərlərə zidd verilişlər yayımlamasına etirazlarını bildiriblər.