Media

Ana səhifə

Media

Əli Həsənov: “MTRŞ-nin qərarı teleradio fəaliyyətinin Avropa Şurası standartlarına uyğunlaşdırılması tələbələrinə cavab verəcək”

29 dekabr 2008 13:43 (UTC +04:00)

Bakı. Kəmalə Quliyeva – APA. “Azərbaycan dövləti olaraq biz radiostansiyaların fəaliyyətini dayandıra bilmərik. Bu radiostansiyaları bağlamaq fikrimiz də yoxdur. Bu radiostansiyaların sahibi biz deyilik. Bu radio sahiblərindən biri İngiltərənin BBC korporasiyası, digəri isə Amerika Yayım Assosiasiyasıdır. Biz sadəcə olaraq, bu radioların fəaliyyətini dünya standartlarına uyğunlaşdırılması istiqamətində tədbirlər görə bilərik”.
APA-nın məlumatına görə, bu barədə Prezident Aparatının ictimai-siyasi şöbəsinin müdiri Əli Həsənov Milli Televiziya və Radio Şurasının sabah xarici radiostansiyaların Azərbaycanda yayımı ilə bağlı keçiriləcək iclasına münasibət bildirərkən deyib. Onun sözlərinə görə, bütün xarici ölkələrdə bu radiolar necə yayımlanırsa, o metodlar da Azərbaycanda tətbiq edilə bilər: “Bu məsələdə başqa cür addım atmağa nə səlahiyyətli, nə də qərarlı deyilik”.
Ə. Həsənov bildirib ki, MTRŞ-nın mövqeyi “Teleradio yayımı haqqında” qanuna əsaslanır: “Azərbaycan 2001-ci ildən bəri Avropa Şurasının üzvü kimi özünün teleradio fəaliyyətini Avropa Şurasının standartlarına uyğunlaşdırmaqdadır. Bu standartlardan biri də ölkənin teleradio məkanının və milli tezliklərin idarə edilməsi sahəsində Avropa Şurasının tələbləridir. “Milli sərhəd televiziyası haqqında” konvensiyaya qoşulmağa hazırlaşan Azərbaycan özünün milli teleradio haqqında qanununu bütün gücü ilə ölkə ərazisinə tətbiq etməlidir və dünya teleradio məkanının standartlarına cavab verəcək bir hala gətirilməlidir. Ona görə də düşünürəm ki, şuranın iclası Azərbaycanın teleradio yayımı haqqında qanunun tətbiqinə və Azərbaycanın teleradio fəaliyyətinin Avropa Şurası standartlarına uyğunlaşdırılması tələbələrinə cavab verəcək”.