Media

Ana səhifə

Media

Azərbaycanda yaradılan yeni idman kanalı yanvarın 1-dən yayıma başlayacaq

30 dekabr 2008 14:40 (UTC +04:00)

Bakı. Kəmalə Quliyeva – APA. Yanvarın 1-dən Azərbaycanda yaradılan yeni idman kanalı - “İdman Azərbaycan” fəaliyyətə başlayacaq. Bu barədə APA-ya “Azərbaycan Dövlət Televiziyası” (Az.TV) Qapalı Səhmdar Cəmiyyətinin (QSC)mətbuat xidmətinin rəhbəri Xatirə Qasımlı məlumat verib. Onun sözlərinə görə, yanvarın 1-dən 22-nə qədər “İdman-Azərbaycan” (Az. TV “Sport”) kanalının sınaq yayımları keçiriləcək. Sınaq yayımları hər gün axşam saatlarında üç saat davam etdiriləcək. Verilişlərin həcmi isə əvvəlcə 11 saata, daha sonra 12-15 saata çatdırılacaq. X. Qasımlının sözlərinə görə, ilkin dövrlərdə “İdman-Azərbaycan” kanalının verilişlərinə Bakıda və Azərbaycanın müxtəlif bölgələrində baxmaq mümkün olacaq. Bir aydan sonra isə kanalın bütün ölkəyə yayımlanması təmin olunacaq. Xaricdə yaşayan soydaşlarımız və ölkə daxilində peyk vasitəsilə Az.TV-yə baxanlar “İdman-Azərbaycan” kanalını kodlaşdırılmış peyk siqnalı vasitəsilə izləyə bilərlər.
Qeyd edək ki, “İdman-Azərbaycan” kanalında futbol, voleybol, güləş, cüdo, yüngül atletika və digər idman növləri üzrə beynəlxalq yarışlar Azərbaycan dilində nümayiş etdiriləcək və bütün ölkə vətəndaşları bu yarışlara pulsuz baxmaq imkanı əldə edəcəklər. Xatırladaq ki, “İdman-Azərbaycan” (Az. TV “Sport”) kanalının açılması ilə əlaqədar qərar Milli Televiziya və Radio Şurasının (MTRŞ) bu il iyulun 18-də keçirdiyi iclasında verilib. MTRŞ-nın Azərbaycanda yeni idman kanalının açılması ilə bağlı elan etdiyi müsabiqədə üç iddiaçı- Az. TV QSC, “Lider” televiziyası və “Rembrandinq” şirkəti iştirak edib. müsabiqənin qalibi kimi yeni idman kanalını açmaq hüququ Az.TV-yə verilib.