Media

Ana səhifə

Media

Azərbaycan Mətbuat Şurası “reket” qəzetlərlə bağlı müvafiq qurumlara müraciət edib

15 yanvar 2009 14:14 (UTC +04:00)

Şuradan APA-ya verilən məlumata görə, məktublarda göstərilir ki, MŞ İdarə Heyətinin 26 dekabr 2008-ci il tarixli iclasında Şura Katibliyinin və müvafiq komissiyalarının təqdimatları əsasında 36 qəzetin ilin “reket” nəşrləri elan olunması barədə müvafiq qərar qəbul edib.

Bu qərarın qəbulu zamanı həmin qəzetlərin Jurnalistin Peşə Davranışı Qaydalarına məhəl qoymamaları, etik prinsiplər və peşə əxlaqı ilə bir araya sığmayan hərəkətlərə yol vermələri, barələrindəki qərar və rəylərdən, tövsiyə və iradlardan nəticə çıxarmamaları əsas götürülüb. Siyahını müxtəlif qurumlara göndərən Mətbuat Şurası həmin nəşrlərlə iş qurularkən bu faktların nəzərə alınacağına əminliyini vurğulayıb.

Qeyd edək ki, MŞ-nin 2008-ci ildə “reket” elan etdiyi qəzetlər bunlardır: “Böyük Naxçıvan”, “Dəryaz”, “Gündəm”, “Ədalət uğrunda”, “Media Azərbaycan”, “Yeni dövr”, “Azərbaycan gəncliyi”, Jurnalist və qanun”, “Vətən andı”, “Ailə”, “İdeal Azərbaycan”, “Vətəndaş hüququ”, “İdeal”, “Xüsusi təhqiqat”, “Taran”, “Aydın Azərbaycan”, “Naxçıvan press”, “Azad press”, “Avrotayms”, “Kadr və tərəqqi”, “Açıq fikir”, “Radikal”, “Azadlıq və zaman”, “Kriminal aləm”, “Fakt”, “Fakt+fakt”, “Müstəqil dövlət”, Müasir Naxçıvan”, “Nurlu səhər”, “Azərbaycan yolu”, “Dünyaya Qarabağ harayı”, “Həftə sonu”, “Xalq vəkili”, “Regionun səsi”, “Yeni Azərbaycan dünyası”.

Həmin qəzetlərdən bəzilərinin barəsində olan məlumatların hüquq-mühafizə orqanlarında araşdırılması da tövsiyə edilib. Bunlar “Naxçıvan press”, “İdeal”, “Kriminal aləm”, “Radikal”, “Avrotayms”, “Taran”, “Xüsusi təhqiqat”, və “Media Azərbaycan” qəzetləridir.

Şuradan “reket qəzet”lərin siyahısının bununla yekunlaşmadığı, araşdırmaların davam etdirildiyi bildirilib.

Mətbuat_Şurası