Media

Ana səhifə

Media

TRT-nin baş direktoru: “Ortaq Türk Televiziyası yaxın zamanlarda fəaliyyətə başlayacaq”

23 fevral 2009 16:02 (UTC +04:00)

İctimai Televiziya və Radio Yayımları Şirkətinin (İTV) İctimaiyyətlə əlaqələr və monitorinq şöbəsindən APA-ya verilən məlumata görə, TRT kanalının baş direktoru İbrahim Şahin İctimai Teleradio Yayımları Şirkətində olub. İbrahim Şahin ilə İTV-nin baş direktor İsmayıl Ömərovun arasında keçirilən görüşdə ikitərəfli əlaqələrin daha da inkişaf etdirilməsi, ortaq Türk Televiziyasının yaradılması ilə bağlı müzakirələr aparılıb.

İ. Ömərov bildirib ki, TRT ilə İTV-nin yüksələn xətt üzrə inkişaf edən əlaqələri bütün türk dünyasının maraqlarına xidmət edir: “İctimai Teleradio hər zaman TRT-dən əsl qardaşlıq münasibəti görüb. İki televiziya arasında həyata keçirilən ortaq layihələr artıq ənənə halını alıb”.

Şirkət əməkdaşlarının peşəkarlığının artmasında TRT-nin daim dəstək verdiyini xatırladan İ. Ömərov həm texniki, həm də yaradıcı kollektivin bundan sonra da TRT-də treninq keçməsi üçün şərait yaradılacağına inandığını söyləyib.

Bir il əvvəl İTV-də olduğunu xatırladan İ. Şahin kanalla əlaqələrə böyük önəm verdiklərini deyib. O, TRT-nin Azərbaycanın ictimai yayımçısı ilə əlaqələri daha da genişləndirəcəyini və hər zaman İTV-yə dəstək olacağını söyləyib.

Ortaq Türk Televiziyasının yaradılması ilə bağlı məsələyə toxunan İ. Şahin bildirib ki, yaxın vaxtlarda bu televiziya fəaliyyətə başlayacaq və ilkin olaraq TRT ilə İTV-nin bazasında formalaşdırılacaq: “Bu kanal bütün türk dövlətlərinin maraqlarına xidmət edəcək. Ortaq türk televiziyasını yaratmaqla biz tarixi bir addım atmış olacağıq. Bunun bəhrəsini bütün türk dünyası görəcək”.