Media

Ana səhifə

Media

Nuşirəvan Məhərrəmli beynəlxalq televiziya kanalının açılması ilə bağlı müsabiqə elan etməmələrinin səbəbini açıqlayıb - EKSKLÜZİV

Nuşirəvan Məhərrəmli beynəlxalq televiziya kanalının açılması ilə bağlı müsabiqə elan etməmələrinin səbəbini açıqlayıb - <font color=red>EKSKLÜZİV</font>

05 mart 2009 15:42 (UTC +04:00)

Bakı. Kəmalə Quliyeva – APA. “Azərbaycan iqtisadi, siyasi, hərbi cəhətdən regionun ən güclü dövlətidir. Azərbaycan həm də energetika ilə bağlı beynəlxalq aləmdə ciddi ölkəyə çevrilib. Bütün bunlarla bağlı, əcnəbi dillərdə Azərbaycan həqiqətlərini, Qarabağ problemini dünyaya çatdırmaq üçün televiziyanın açılması məsələsi çoxdan müzakirə olunurdu. Amma bu missiyanı həyata keçirmək çox çətindir. Çox ciddi məsələ olduğu üçün ciddi qurumların da müraciəti olmalı idi. ATV kanalı da bu ciddi missiyanı öz üzərinə götürdü və biz də bu işdə ona dəstək verdik”. Bu barədə APA-ya eksklüziv açıqlamasında Milli Teleradio Şurasının (MTRŞ) sədri Nuşirəvan Məhərrəmli Şuranın birbaşa peyk vasitəsilə yayımlanacaq “ATV İnternational” (ATV İnt) televiziya kanalına lisenziya verilməsi ilə bağlı iclasın yekunundan sonra bildirib.

N. Məhərrəmli “ATV İnt”-ə tezlik verilməməsinin səbəblərinə də aydınlıq gətirib: “Şura birbaşa peyk yayımı ilə bağlı “ATV İnt”-ə icazə verdi. Buna görə də onlara tezlik vermədik. Onlar özləri başqa peyklərlə müqavilə bağlayaraq fəaliyyət göstərəcəklər. Tezlik vermədiyimiz üçün müsabiqə də elan etmədik. “ATV İnt” yerüstü yayımlansaydı, biz o zaman müsabiqə elan edərdik. Bununla bağlı Şura üzvləri ilə çox ciddi müzakirələrimiz oldu. Şura üzvlərinin yekdil qərarı ilə tezlik ayrılmadan, müsabiqəsiz “ATV İnt”-ə bu icazəni verdik”.

Şura sədri deyib ki, MTRŞ-ya beynəlxalq televiziyanın açılması ilə bağlı şifahi müraciətlər çox olub. Rəsmi müraciətlər olmadığına görə, Şura bu müraciətlərə baxmayıb: “Rəsmi şəkildə müraciət ATV-dən gəldi, biz də bu müraciətə çox müsbət yanaşdıq. Bu çox ciddi məsələ olduğu üçün yəqin ki, ATV kanalı da öz üzərinə düşən məsuliyyəti dərk edir”.

“ATV İnt”də neçə əcnəbi dildən istifadə olunacağını kanal özü qərar verəcək. Lakin yeni kanalda əsasən ingilis, rus, fars, türk və erməni dillərindən istifadə olunacağı gözlənilir: “Kanalda təkcə xəbərlər proqramı olmayacaq. Musiqi, Azərbaycanla bağlı tarixi filmlər, bədii filmlər də olacaq. Özəl qurum olduğu üçün yaradıcılıq məsələlərini kanal özü müəyyənləşdirəcək. Hesab edirəm ki, son zamanlar ATV maddi-texniki bazası, kadr potensialı cəhətdən xeyli inkişaf edib. İnanıram ki, ATV bu işin öhdəsindən gələcək”.

Başqa yerli kanalların MTRŞ-ya müraciət edərək, öz beynəlxalq televiziyalarını açması ilə bağlı müraciətlərinə gəldikdə isə N. Məhərrəmli qeyd edib ki, bu məsələdə ifrata varmaq lazım deyil: “Bu gün ATV bizə müraciət edib, biz bu müraciətə dəstək vermişik. Yaşayarıq, görərik. Hələ belə bir müraciət yoxdur”. Peykdə yayımlanmasına baxmayaraq yeni beynəlxalq kanala Şuranın nəzarəti yetərincə olacaq. N. Məhərrəmlinin sözlərinə görə, bu kanal Azərbaycandan peykə çıxdığı üçün nəzarət mexanizmləri də ölkənin əlində olacaq: “Biz bu nəzarət mexanizmini işləyib hazırlayacağıq. Bununla bağlı ciddi problem yoxdur. Bizim texniki imkanlarımız “ATV İnt”-ə nəzarəti həyata keçirməyə imkan verir”.

beynəlxalq_televiziya