Media

Ana səhifə

Media

Ötən ay Azərbaycan mətbuatında 2545 peşə etikası pozuntusu aşkarlanıb

13 mart 2009 11:15 (UTC +04:00)

Bakı. Kəmalə Quliyeva – APA. Azərbaycan Mətbuat Şurası (MŞ) “Mətbuatda peşə etikası norma və qanunlarının gözlənilməsi” layihəsi çərçivəsində fevral ayı üçün mətbuatda aparılan monitorinqin nəticələrini açıqlayıb. APA-nın məlumatına görə, MŞ sədri Əflatun Amaşov bu gün keçirdiyi mətbuat konfransında bildirib ki, ötən ay mətbuatda 2545 peşə etikası pozuntusu aşkarlanıb. Bu pozuntuların 2355-i (92,6 %) mətbu KİV-də, 190-ı (7,4 %) internet saytda qeydə alınıb. Orta hesabla hər mətbuat orqanına 42 pozuntu düşür. Ə. Amaşovun sözlərinə görə, monitorinq “KİV haqqında” qanun və “Azərbaycan jurnalistlərinin peşə davranışı qaydaları”nın tələblərinə əsasən aparılır.

MŞ sədri deyib ki, qəzetlərdə ən çox rast gəlinən pozuntular müəllifin yazılarına istinad edilmədən istifadə (530 dəfə), özgəsinin materialından müəllifi göstərilmədən öz imzası ilə istifadə (444 dəfə), balansın pozulması (384 dəfə), jurnalistin tərəf kimi çıxış etməsi (324 dəfə), inandırıcı olmayan izaha əsaslanmaqla informasiya mənbəyinə istinad edilməməsi (269 dəfə), jurnalistin lehinə və ya əleyhinə təbliğata yol verməsi (220 dəfə), işgüzar imicə zərbə vurulması (68 dəfə), böhtan (68 dəfə), faktın təhrifi (41 dəfə), hadisənin şərait detallarının təhrifi (35 dəfə), real olmayan fakta əsaslanan tənqid (35 dəfə), siyasi ayrı-seçkilik və siyasi mənsubiyyətə görə nalayiq münasibət (31 dəfə), zorakılıq və cinayət qurbanlarının şəxsiyyətini dəqiqləşdirməyə imkan verən foto şəklin adın və başqa detalların dərcidir (13 dəfə).

Mətbuat orqanlarından isə “Təzadlar”, “Səs”, “İki sahil”, “Mövqe”, “Həftə içi”, “1 News”, “Yeni Müsavat”, “Müasir Müsavat” və “Bizim yol”un səhifələrində pozuntular daha xarakterik hal alıb.

Ə. Amaşovun sözlərinə görə, ötən ay qəzet və saytlarda “adın qorunması (şərəf və ləyaqət, şəxsi həyatın toxunulmazlığı)” prinsinin 184 dəfə pozulduğu aşkarlanıb.