Media

Ana səhifə

Media

Milli Məclisin üzvü teleaparıcı Turan İbrahimovla bağlı MTRŞ və “Lider” televiziyasına müraciət edib

17 mart 2009 13:35 (UTC +04:00)

Bakı. Elbrus Seyfullayev - APA. Azərbaycan Milli Məclisinin üzvü “Lider” televiziyasının aparıcısının efirdə işlətdiyi ifadələrlə bağlı Milli Televiziya və Radio Şurasına (MTRŞ) müraciət edib. Bu barədə APA-ya açıqlamasında deputat Nazim Məmmədov bildirib. Deputat bir neçə gün əvvəl “Lider” televiziyasının aparıcısı Turan İbrahimovun Gədəbəy rayonunun sakinlərini təhqir etdiyini deyib. Onun sözlərinə görə, T. İbrahimov aparıcısı olduğu “Əyri-düz” verilişində müğənni Natəvan Həbibi ilə müsahibə apararkən müğənniyə “Get, Gədəbəyin, Qazaxın kəndlərindən bir nəfər götür, əhliləşdir ərə get”, - deyə müraciət edib. N. Məmmədov əhliləşdirmənin insanlara yox, heyvanlara aid termin olduğunu bildirib və aparıcının adı çəkilən rayonların insanlarından üzr istəməsini tələb edib: “Mən Gədəbəyin deputatıyam. Mənə yerlərdən yüzlərlə müraciət olunub. Seçicilərimin təhqir olunmasını qəbul edə bilmərəm. Bu məsələ ilə bağlı Milli Televiziya və Radio Şurası və “Lider” televiziyasının rəhbərliyinə müraciət etdim. Artıq Milli Televiziya və Radio Şurası məsələni müzakirə edib. Əlimdə aparıcının gədəbəyliləri təhqir etdiyini təsdiqləyən video-kaset var. Televiziyanın baş prodüseri Murad Dadaşov da mənə söz verdi ki, yaxın günlərdə baş verən hadisəyə görə efirdə Gədəbəy camaatından üzr istəniləcək. Bundan başqa, Gədəbəydə konsert proqramı təşkil olunacaq, orada da insanlara arayış veriləcək”.

Aparıcı Turan İbrahimov isə APA-ya açıqlamasında sözügedən verilişdə belə bir ifadə səsləndirmədiyini deyib.