Media

Ana səhifə

Media

Türkiyə jurnalistləri Azərbaycana səfərlərinin yekunları ilə bağlı məqalələr yazıblar

30 mart 2009 12:17 (UTC +04:00)

Bakı. Kəmalə Quliyeva - APA. Millət vəkili Qənirə Paşayeva və “Zaman-Azərbaycan” qəzetinin baş redaktoru Enes Cansevərin təşkilatçılığı ilə Xocalı faciəsinin 17-ci ildönümü münasibətilə Tovuz rayonunda keçirilən tədbirlərə qatılan Türkiyənin bir neçə qəzet və televiziyasının təmsilçisi təmsil etdikləri mətbuat orqanlarında Azərbaycan həqiqətlərini əks etdiriblər. APA-nın məlumatına görə, Qarabağ müharibəsi və onun dəhşətləri, Xocalı soyqırımı ilə bağlı faktlar Türkiyənin “Zaman”, “Yeni Şafaq”, “Kanal 7”, “Aksiyon”, “Bu gün”, “Star” kimi mətbuat orqanlarında işıqlandırılıb.
Türkiyənin “Kanal 7” televiziyasının əməkdaşı Ünal Tanık “Azərilər niyə zalım, ermənilər niyə məzlum rolunda?” yazısında belə yazıb: “Türkiyənin Ermənistanla sərhədləri aça biləcəyi ehtimalı Azərbaycanda böyük qayğı yaratmış durumda. Türk-erməni münasibətlərindən yaranan qayğıların kökü isə daha çox bu nöqtələrdə toplanılır:
- Türkiyə Ermənistanla sərhədləri açarsa, Ermənistan bir daha Azərbaycanla anlaşmağa razı olmaz.
- Ermənilər, suçlu olmalarına rəğmən, hər zaman özlərinin haqlı olduqlarını göstərməyi bacarır. Türkiyə ermənilərin bu oyunlarına getməməlidir.
- Ermənilərin nəfəs boruları bağlandığına baxmayaraq, hərəkətlərinə diqqət etmirlər. Əgər sərhədlər açılsa, ermənilər inkişaf edən iqtisadiyyatları sayəsində azərbaycanlılarla razılaşmağı bir tərəfə qoyub, indiyə qədər dondurduqları Türkiyədən ərazi tələblərini də yenidən isitməyə calışarlar”.

“Bu gün” qəzetinin yazarı Huh Könültaş “Dünya belə qırğın görmədi!” yazısında bunları qeyd edib: “Azərbaycan rəsmilərində və vətəndaşlarında Türkiyənin Ermənistanla görüşmələri üzündən ciddi bir narahatlıq var. Başqa cür desək, “Əcəba,Türkiyə bizi satarmı?” narahatlığı içindədirlər. Burada hər kəs Türkiyə Ermənistanla sərhədləri açarsa, Azərbaycanın Qarabağ bölgəsini əsla geri ala bilməyəcəyinə inanır. Çünki bu məsələdə Azərbaycanın arxasında sadəcə Türkiyə var. Rusiya, Amerika və hətta Avropa ölkələri təəssüf ki, Ermənistanı dəstəkləyir.
AKP hökumətinin Qarabağ mövzusundakı susqunluğu azəriləri fəna halda üzür və burada bəzi dairələr bu durumdan Türkiyə əleyhinə istifadə edir.
Azərilər türk mətbuatından ciddi şikayət içindədir. Hrant Dinkin ölüm ildönümünə ayrılan yer və zamanın Qarabağa göstərilmədiyini, Xocalı soyqırımına yer verilmədiyini söyləyirlər. Azəri qardaşlarımız “Uman yerdən küsərlər” deyirlər. Türkiyədən son nəticədə Azərbaycan əleyhinə heç bir addıma izin verməyəcəyini umurlar. Amma dediyim kimi, yenə də narahatlıqları yox deyil”.

“Zaman” qəzetinin yazarı Fikri Türkel “Azərbaycan türkülərini kim sevməz?” yazısında isə belə yazıb: “Qarabağı da çox görmək istərdim. Azərbaycanın yanıqlı və duyğu dolu türkülərinin ən zəngin qaynaqlarından biri oradır. Bu gün işğal altında və bölgədəki 1 milyon azəri köçkün durumdadır. Azərbaycan türkülərini sevirsinizsə, Qarabağın zəngin iqliminin işğal altında olmasının nə demək olduğunu da düşünün. Bakıda Şəhidlər Xiyabanını dolaşarkən 1918-ci ildə orada şəhid düşmüş minlərcə Anadolu gəncinin adlarını gördüm. Bir tərəfdə Çanaqqala, bir tərəfdə Bakı. İnanılmaz bənzərliklər var. Gördüyünüz kimi, bilməyimiz gərəkən çox şey var”.

Həftəlik xəbər dərgisi olan “Aksiyon” isə “Azərbaycan-Ermənistan sərhədində tətikdə bir həyat” başlıqlı yazı dırc edib: “Azəri kəndləri işğal edilən Qarabağ bölgəsindəki erməni nişançılar tərəfindən tez-tez atəşə tutulur. Ermənilər 2008-ci ildə 150 qadın və uşağı öldürdü. Avropa Şurasına da məlum olan bu olaya dünya səssiz baxır. Cocuğunuzun gözlərinin ovularaq qətl edildiyinə, yaxınlarınız öldürüldükdən sonra qulaqlarının və burunlarının kəsildiyinə, bacınızın qarnı deşilərək hələ doğmadığı cocuğu ilə bərabər öldürüldüyünə şahid olsanız nə yaparsınız?”.