Media

Ana səhifə

Media

Nuşirəvan Məhərrəmli: “Dəyişiklərdə əsas məqsəd teleradio sahəsində vəziyyətin dünyada mövcud praktikaya uyğunlaşdırılmasıdır”

06 aprel 2009 08:31 (UTC +04:00)

Bakı. Kəmalə Quliyeva - APA. “Televiziya və radio yayımı haqqında” qanuna əlavə və dəyişiklər telekanallarda rastlaşdığımız, lakin qanunvericilidə həllini tapmamış hallarla bağlıdır, ona görə də bu əlavələri elədik”. Bu sözləri APA-ya Milli Televiziya və Radio Şurasının (MTRŞ) sədri Nuşirəvan Məhərrəmli Milli Məclisin aprelin 3-də keçirilmiş iclasında “Televiziya və radio yayımı haqqında” qanuna edilən əlavə və dəyişiklərə münasibət bildirərkən deyib.

Onun sözlərinə görə, sözügedən dəyişikliklər MTRŞ tərəfindən iki il əvvəl təklif olunub: “Dəyişikliklər daha çox texniki xarakter daşıyır. Şura fəaliyyətə başlayandan sonra bəzi özəl regional televiziyalar kanallarını satmağa başladı. Hər hansı telekanalın təsisçisinin dəyişməsində, alğı-satqı həyata keçirməsində heç bir problem yoxdur, amma lisenziyanın sahibi olmaqda problem var. Elə olur ki, kanalın yeni sahibi olmuş şəxs bizə deyir ki, bu kanalın sahibidir, sənədlərini rəsmiləşdirək. Qanunvericilikdə isə “Telekanalların sahibi kimlər ola bilər?” sualına aydın cavablar var. Şəxsin ağır və xüsusilə ağır cinayətlərdə iştirakı, məhkumluğu ola bilməz. İctimai mənafe əleyhinə məhkumluğu olan, fəaliyyət qabiliyyətsizliyi məhkəmə tərəfindən sübut olunan, Azərbaycan vətəndaşı olmayan, siyasi partiyalarla bağlılığı olan şəxslər telekanalın təsisçisi ola bilməz. Bütün bu şərtləri biz qabaqcadan yoxlamalıyıq”.

N. Məhərrəmli deyib ki, Qubada fəaliyyət göstərən “Xəyal” televiziya kanalı satılarkən Şura bu problemlə üzləşib. Daha sonra isə “Kəpəz” televiziyası alğı-satqı obyekti olub: “Ona görə də biz qərara gəldik ki, bu cür halların qarşısını almaq üçün tədbir görülməlidir. İndi isə qanunda dəqiqləşdirilmələr aparılıb. Kanalın təsisçisi olmaq istəyən şəxs Şuraya qabaqcadan bütün lazım olan tələblərlə bağlı arayış verməlidir”.

Qanunvericiliyin telekanalların reklamla əlaqədar fəaliyyətinə də aydınlıq gətirdiyini qeyd edən N. Məhərrəmlinin sözlərinə görə, qanuna əsasən, sutka ərzində telekanalların verilişlərinin 20 faizi reklama ayrılır. Bu isə bir saatın 12 dəqiqəsi deməkdir: “Bəzi kanallar elə bilir ki, əgər reklam 1 sutkanın 20 faizini əhatə etməlidirsə, 24 saatı həmin rəqəmə bölüb, 3 saat reklam yerləşdirmək olar. Bu reklamların əksəriyyətini axşam saatlarında, telekanallara daha çox baxılan vaxtlarda yerləşdirir, digər vaxtlarda isə az reklam verirdilər. İndi isə dəqiq göstərilir ki, hər saatda 12 dəqiqədən artıq reklam vermək olmaz”.

N. Məhərrəmlinin sözlərinə görə, qanuna peyk yayımı ilə bağlı yeni maddə də əlavə olunub: “Yeni dəyişikliyə əsasən, xarici ölkə kanallarının öz maşınları ilə birgə müəyyən ictimai-siyasi hadisələr, xarici ölkə rəhbərlərinin səfərləri, beynəlxalq idman yarışları zamanı müvəqqəti olaraq peyk vasitəsilə Azərbaycan ərazisindən canlı yayım təşkil etməsinə icazə verilir. Əvvəllər qanunvericilikdə bununla bağlı heç bir maddə yox idi”.

Şura sədrinin sözlərinə görə, bundan sonra kanallar bir tezlikdə eyni vaxtda iki proqram yayımlaya bilməzlər: “Kanal eyni vaxtda Bakıdan bir proqramla, Qusarda başqa proqramla çıxış edə bilməz. ANS kanalında belə hal olmuşdu. Onlar elə bilirlər ki, tezlik bunlarındısa, Bakıda bir proqram, başqa yerdə bir proqram yayımlaya bilərlər”.

Yeni dəyişikliklər əsasən, telekanallara Şura tərəfindən bir ildə ən azı üç dəfə xəbərdarlıq edilirsə, MTRŞ kanalın yayımının 1 ay ərzində müvəqqəti dayandırılması üçün məhkəməyə müraciət edə bilər: “Əvvəllər isə sanksiyanın konkret miqdarı göstərilmirdi. Kanala bir dəfə də sanksiya verilə bilərdi, 10 dəfə də. Kanalların fəaliyyəti məhkəmə qərarı ilə 1 ay müddətinə dayandırıla bilər. Əvvəlki qanunvericilikdə isə bu müddət 20 gün idi”.

N. Məhərrəmlinin sözlərinə görə, dəyişiklərdə əsas məqsəd teleradio sahəsindəki vəziyyətin dünyada mövcud olan praktikaya uyğunlaşdırılmasıdır.