Media

Ana səhifə

Media

Azərbaycan KİV nümayəndələri türkiyəli həmkarlarına müraciət qəbul ediblər

07 aprel 2009 10:07 (UTC +04:00)

Bakı-APA. Azərbaycan kütləvi informasiya vasitələrinin nümayəndələri Türkiyədən olan həmkarlarına müraciət qəbul edib. APA-nın məlumatına görə, müraciətdə bildirilir ki, son vaxtlar Türkiyə ilə Ermənistan arasında sərhədlərin açılacağı, diplomatik və iqtisadi əlaqələrin qurulacağı haqqında xəbərlər bütün Azərbaycan ictimaiyyəti kimi, jurnalistləri də ciddi narahat etməkdədir: “Türkiyənin hakimiyyət nümayəndələrinin bu xəbərləri təkzib etməməsi, eyni zamanda, qardaş ölkənin ictimai-siyasi xadimlərinin çıxışlarında və mediada Ermənistanla Türkiyə arasında əlaqələrin qurulmasını təsdiq edən çoxsaylı faktların açıqlanması bu müraciətin ünvanlanmasını zərurətə çevirən əsas səbəblərdir. Ölkələrlə əlaqə qurmaq, münasibət formalaşdırmaq hər bir dövlət kimi Türkiyənin də suveren hüququdur. Tarix əbədi olaraq sərhədləri bir-birinin üzünə qapalı ölkələr tanımır. Ən kəskin ziddiyyətlər, qarşıdurmalar, problemlər nə vaxtsa dinc yolla, danışıqlar masası arxasında həllini tapır. Bu tale yaşadığımız Cənubi Qafqaz regionu üçün də qaçılmazdır. Lakin həm Türkiyəyə, həm də Azərbaycana qarşı iddialarla çıxış edən, üstəlik, 15 ildən çoxdur ki, Azərbaycan torpaqlarını işğal altında saxlayan, azərbaycanlılara qarşı etnik təmizləmə siyasəti həyata keçirən Ermənistanla bərabərhüquqlu və konstruktiv münasibətlərin qurulmasından danışmaq hələ çox tezdir”.

Müraciətdə bildirilir ki, Türkiyə ilə Ermənistan arasında münasibətlərin qurulmasından əvvəl bu dövlətlər arasındakı sərhədlərin bağlı olması səbəblərinə, mövcud durumu zəruri edən amillərə, atılması planlaşdırılan addımın haqq-ədalət prinsiplərinə uyğunluğuna, nəhayət, eyni soykökə malik, dili, dini, mədəniyyəti, adət-ənənələri bir olan millətin məskunlaşdığı iki ölkə arasındakı münasibətlərə göstərəcəyi təsirə nəzər salınmalıdır: “Türkiyə Cümhuriyyəti 1993-cü ildə Ermənistanla sərhədlərini bağlayarkən yalnız bu ölkənin ona qarşı irəli sürdüyü ərazi və qondarma “soyqırımı” iddiasını əsas götürməmiş, eyni zamanda türk həmrəyliyinə, qardaşlığına böyük sədaqət və ehtiram əlaməti olaraq Azərbaycan ərazilərinin 20 faizinin işğal edilməsini, azərbaycanlılara qarşı etnik təmizləmə və soyqırımı siyasəti həyata keçirildiyini ciddi səbəblər sırasında vurğulamışdı. Azərbaycan xalqı da eyni dəstək və doğmalıqla hər zaman Türkiyənin yanında olduğunu nümayiş etdirib. Azərbaycan ictimaiyyəti, dövlət və vətəndaş cəmiyyəti institutlarının nümayəndələri, xaricdəki diaspora təşkilatlarımız Ermənistanın ölkəmizə qarşı işğalçılıq siyasəti ilə yanaşı, Türkiyəyə qarşı “soyqırımı” və ərazi iddialarının ifşa olunması istiqamətində də məqsədyönlü fəaliyyət göstəriblər”.
Müraciəti imzalayanlar qeyd ediblər ki, işğalçı dövlətlə hərtərəfli əməkdaşlıqdan imtina, sərhədlərin bağlanması beynəlxalq aləmdə məqbul hesab edilən və təcrübədə özünü doğruldan siyasi vasitələrdəndir: “Biz bunun əlamətlərini Türkiyə-Ermənistan münasibətlərinin mövcud durumunda görür və yüksək qiymətləndiririk. Ermənistan işğal olunmuş Azərbaycan torpaqlarının qeyd-şərtsiz boşaldılması ilə bağlı Birləşmiş Millətlər Təşkilatının qətnamələrini yerinə yetirmir, Avropa Şurası, İslam Konfransı Təşkilatı və digər mötəbər beynəlxalq qurumların çağırışlarına məhəl qoymur, ATƏT-in Minsk Qrupunun vasitəçiliyi ilə Ermənistan-Azərbaycan Dağlıq Qarabağ münaqişəsinin həlli istiqamətində aparılan danışıqlar prosesində barışmaz mövqe nümayiş etdirir. Belə bir vəziyyətdə Türkiyənin Ermənistanla sərhədləri açması və hərtərəfli əlaqələr qurmasından yalnız Ermənistanın faydalanacağına şübhə qalmır. Əminik ki, bu addım Azərbaycanla Ermənistan arasındakı danışıqlar prosesinə mənfi təsir göstərəcək, Ermənistanın işğalçı siyasətinə bəraət qazandıracaq və onu yeni işğallara həvəsləndirəcəkdir. Digər tərəfdən, Türkiyə Ermənistanla əlaqələr qurduqdan sonra da ermənilərin Türkiyəyə qarşı ərazi iddiası ilə çıxış edəcəyi, erməni lobbisinin “soyqırımı”nı tanıtmaq cəhdlərindən əl çəkməyəcəyi şübhə doğurmur. Biz tarixin sərt məqamlarında türkiyəli həmkarlarımızın ədalətin müdafiəsinə qalxma cəsarətinə, yüksək peşəkarlığına, dəyanətinə və dönməzliyinə istinad edərək Sizi “bir milllət, iki dövlət» ideyasına zərbə vura biləcək təhlükənin qarşısının alınmasında yenə öncüllük göstərməyə səsləyirik. İnanırıq ki, sizin həmrəyliyiniz, əməli fəaliyyətiniz və qətiyyətiniz AKP iqtidarının Ermənistanla sərhədləri açmaq niyyətinin qarşısına keçilməz sədd çəkəcəkdir”. Müraciəti Azərbaycanın çox sayda kütləvi informasiya vasitələrinin əməkdaşları imzalayıb.