Media

Ana səhifə

Media

Azad Məmmədov: “İctimai Televiziya və Radio Yayımları Şirkətinin rəhbərləri bu kollektivin içindən seçilməlidir”

09 aprel 2009 10:30 (UTC +04:00)

- İctimai Teleradionun baş direktoru seçilmək şansınızı necə qiymətləndirirsiniz?

- Mənə elə gəlir ki, İctimai Televiziya və Radio Yayımları Şirkətinin rəhbərləri elə bu kollektivin içindən seçilməlidir. Çünki burada işləyən direktorlar, redaktorlar, rejissorlar ictimai yayımın mahiyyətini kənardan müşahidə edənlərdən dəfələrlə yaxşı bilirlər.

- Hazırkı baş direktor İsmayıl Ömərovla uzun müddət bir yerdə çalışmısınız.

- Bəli, uzun illər bir yerdə işləmişik. Amma mən İctimai Teleradiodakı postumu özümün peşəkarlığıma, çoxillik təcrübəmə görə tutmuşam. Namizədliyə gəlincə isə açığı, gördüm ki, bu mübarizədə İsmayıl Ömərovun qarşısına heç kim çıxmır. İllərdir özlərini televiziya mütəxəssisi, ekspert kimi qələmə verənlər hələ də küncdə-bucaqda dedi-qodu ilə məşğuldurlar. Mən isə fikirləşirəm ki, ən yaxşısı mübarizəyə qatılmaqdır.

- İsmayıl Ömərovun bu iddianızdan xəbəri varmı və bunu necə qarşıladı?

- Təbii ki, məlumatı var və normal qarşıladı. İsmayıl müəllim həmişə qeyd edir ki, sizin sıralarınızda İctimai Teleradioya rəhbərlik edə biləcək şəxslər kifayət qədərdir. Mənim 40 illik televiziya təcrübəm var, əməkdar mədəniyyət işçisiyəm. Dörd ildir İctimai Teleradioda direktor vəzifəsində çalışıram və qəbul olunan qərarlarda mənim də rolum az deyil.

- Bu qərarınız kollektivdə necə qarşılandı?

- Bura spesifik bir institutdur. İctimai Teleradioda çox demokratik bir mühit var. Ona görə də mənim qərarım hər kəs tərəfindən normal qarşılandı. Siz bircə dəfə bizim Direktorlar Şurasının və ya kollektivin ümumi iclasında olsanız, müzakirələri dinləsəniz, görərsiniz ki, qərarlar hansı ciddi mübahisələrdən sonra qəbul olunur. Yenə qeyd edirəm ki, belə bir kollektivdə bu cür addım tam normal qarşılanır.

- Bəziləri düşünə bilər ki, siz əvvəlcədən nəticəni bilə-bilə namizədliyinizi irəli sürmüsünüz.

- Razılaşdırılmış və yaxud da qondarma namizədə ehtiyac yoxdur. Məlumat üçün deyim ki, qanuna görə alternativsiz tək namizəd də ola bilər. Mən mübarizəni loyal müşahidədən üstün tuturam.

- Hazırkı baş direktor yenidən seçiləcəyi təqdirdə İctimai Teleradioda tutduğunuz postla vidalaşma ehtimalınızdan narahat deyilsiniz ki?

- Xeyr, bundan narahat deyiləm. Vaxtilə İsmayıl Ömərova pislik edənlərin, hətta işdən çıxaranların övladları hazırda İctimai Teleradioda çalışır. Ona görə də hesab etmirəm ki, o seçiləcəyi təqdirdə məni işdən uzaqlaşdırsın.

- Özünüzə əsas rəqib kimi görürsünüz?

- Mənim üçün İsmayıl Ömərov ciddi rəqibdir. Bəhruz Məhərrəmov isə gənc jurnalistdir və hər halda əsas mübarizənin İsmayıl Ömərovla mənim aramda gedəcəyini düşünürəm.

İTV_Direktor