Media

Ana səhifə

Media

“Azərbaycan Qadını və Demokratik Cəmiyyət Quruculuğu: Reallıqlar və Perspektivlər” mövzusunda müsabiqə keçiriləcək

16 aprel 2009 15:40 (UTC +04:00)

Bakı-APA. “Lider Qadınlar” və “Demokratik İnkişaf İnstitutu” İctimai Birlikləri jurnalistlər arasında “Azərbaycan Qadını və Demokratik Cəmiyyət Quruculuğu: Reallıqlar və Perspektivlər” mövzusunda müsabiqə keçirəcək. İctimai birliklərin APA-ya daxil olmuş birgə press-relizində Azərbaycan qadınının bütün tarixi dönəmlərdəki rolları xatırladılıb.

Məlumata görə, müsabiqə qadın problemləri və qadınların cəmiyyətdə təmsilçiliyinin daima Azərbaycanın ictimai-siyasi həyatının gündəliyində saxlamaq, cəmiyyətdə qadınların real mövqeyi və demokratik cəmiyyət quruculuğunda oynadığı rolu dəyərləndirmək, Azərbaycan qadınının cəmiyyətdə özünütəsdiqi zamanı üzləşdiyi problemlərin sistemləşdirilməsi, həmçinin Azərbaycan qadınlarının demokratik cəmiyyət quruculuğunda mövqelərini möhkəmləndirmək və ictimai-siyasi çəkisinin artırılması məqsədilə konkret tədbirlərin müəyyənləşdirilməsi məqsədilə keçirilir.

Müsabiqədə hazırda hər hansı mətbuat orqanında çalışan, yaşı 35-dən yuxarı olmayan şəxslər iştirak edə bilər. Müsabiqədə iştirak etmək üçün 15 may 2009-cu il tarixinədək Təşkilat Komitəsinə müraciət oluna bilər. Müsabiqənin nəticələri peşəkar jurnalistlər və ictimaiyyətin tanınmış nümayəndələrindən ibarət münsiflər heyəti tərəfindən dəyərləndiriləcək.

Müsabiqənin nəticələri bu il iyunun 30-da açıqlanacaq, qaliblər isə iyulun 22-də mükafatlandırılacaqlar.

Müsabiqədə ən yüksək nəticəni əldə edən qalibin xarici ölkələrin aparıcı mətbuat orqanlarının birində təcrübə mübadiləsinə göndərilməsi də nəzərdə tutulub.

Müsabiqənin informasiya dəstəyi APA Agentliyi, İTV və Xəzər televiziyasıdır.