Media

Ana səhifə

Media

Qadın Jurnalistlər Birliyi Beynəlxalq Mətbuat Azadlığı günü ilə bağlı mükafatlar təqdim edib

01 may 2009 11:12 (UTC +04:00)

Bakı.Laçın Sultanova-APA. Azərbaycan Qadın Jurnalistlər Birliyi (AQJB) BMT-nin elan etdiyi 3 may Beynəlxalq Mətbuat Azadlığı gününə hər olunmuş tədbir keçirib. APA-nın məlumatına görə, birliyin rəhbəri Sevinc Osmanqızı Azərbaycan jurnalistikasının keçdiyi yoldan, onun inkişafı və problemləri barədə danışıb. Tədbirdə “Jurnalistikaya Sədaqət”, “Jurnalistikada cəsarət”, “Mətbuatın İnkişafına Dəstək” mükafatları təqdim edilib.
Tədbirdə çıxış edən BMT-nin Azərbaycandakı nümayəndəsi Bruno Pueza Mətbuat Azadlığı Günün tarixi barədə danışıb, media nümayəndələrinin hüquqlarının qorunmasının vacibliyindən danışıb. “Hücuma məruz qalan jurnalistlərin sayı dünya üzrə şok dərəcədə artıb” deyən B. Pueza deyib ki, bu ilin əvvəlindən 11 jurnalist qətlə yetirilib: “Keçən ilin sonuna olan məlumatlara görə müxtəlif ölkələrdə həbsdə 125 jurnalist saxlanılır, onların əksəriyyəti Çin, Kuba və Eritriyadadır”.
O Azərbaycan mətbuatının 15 il ərzində böyük yol keçdiyini deyib. B. Pueza Azərbaycan Dövlət Neft Akademiyasında dünən baş vermiş faciə zamanı jurnalistlərin fəaliyyətini xüsusi qeyd edib və Azərbaycan jurnalistikasına hər cür yardım göstərməyə hazır olduğunu bildirib. Tədbirdə ATƏT-in Azərbaycandakı nümayəndəsinin müavini Aleksis Şahtaxtinski, Böyük Britaniya, Norveç və Fransanın ölkəmizdəki səfirləri, Avropa Şurasının Bakıdakı nümayəndəliyinin təmsilçisi iştirak ediblər.