Media

Ana səhifə

Media

Azərbaycan millət vəkilləri ABŞ prezidenti Barak Obamanın Azərbaycanda medianın vəziyyəti ilə bağlı fikirlərini tənqid ediblər

08 may 2009 10:46 (UTC +04:00)

Bakı. Elbrus Seyfullayev - APA. Milli Məclisin yaz sessiyasının növbəti iclası keçirilir. İclasdan əvvəl millət vəkilləri cari məsələlərlə bağlı çıxış ediblər. APA-nın xəbərinə görə, deputatlar ABŞ prezidenti Barak Obamanın Ümumdünya Mətbuat Azadlığı günü ilə bağlı müraciətində Azərbaycanda mətbuat azadlığı barədə söylədiyi fikirlərə etiraz ediblər.

Deputat Qənirə Paşayeva ABŞ prezidentinin Azərbaycanla bağlı fikirlərini ədalətsiz adlandırıb. O bildirib ki, Azərbaycanın Zimbabve, Özbəkistan kimi ölkələrlə müqayisə etmək düzgün deyil: “Xarici İşlər Nazirliyi ABŞ-ın Azərbaycandakı səfirlini dəvət edib, məsələyə aydınlıq gətirməlidir. Niyə Ermənistan kimi qeyri-demokratik ölkəyə eyni münasibət göstərib onların adı çəkilmir?”

Deputat Səyavuş Novruzov Azərbaycan mətbuatının vəziyyətinin Avropa ilə eyni, ABŞ-dan isə üstün olduğunu iddia edib: “Ermənistanda ötən il baş verən mart hadisələri zamanı bütün mətbuat qapanmışdı. Niyə bununla bağlı bir kəlmə də demədilər? Bilmirəm səfirlik işləmir, ya doğru məlumatlar çatdırılmır?”

Deputat Xanhüseyn Kazımı da məsələ ilə bağlı Azərbaycan XİN-in tədbir görməsini təklif edib.

Millət vəkili Mübariz Qurbanlı isə çıxışında “ola bilsin ki, Azərbaycanla bağlı fikirlər ABŞ prezidentinə yanlış məlumatların verilməsinin nəticəsidir” deyib. O, eyni zamanda bunun ABŞ-ın Azərbaycandakı səfirliyinin günahı olduğunu qeyd edib.

Spiker Oqtay Əsədov da məsələyə münasibət bildirib: “Ötən dəfə demişdim ki, biz pis işləyirik. Qəzetlər isə yazıb kİ, guya mən demişəm ki, biz işləmirik. Mən deyirəm ki, biz işləməliyik. Bir erməni senator Obamaya məktub yazıb ki, siz “soyqırım” deməsəniz, biz gələn seçkilərdə uduzacağıq. Şübhə etmirəm ki, ABŞ prezidentinin Azərbaycanla bağlı çıxışında yüz faiz erməni lobbisinin rolu var. Cənab deputatlar, hamıdan çox səfirlikdə siz olursuz. Niyə Azərbaycan həqiqətlərini çatdırmırsınız? Siz niyə bu işləri görmürsünüz? Əfsus ki, milli mənafelər tələb olunan yerdə biz azərbaycanlıların əksəriyyəti neqativ məlumatlar veririk”.

Spiker onu da deyib ki, baş verənlər ABŞ-Azərbaycan münasibətlərinə xələl gətirməyəcək.

Millət vəkilləri Azərbaycan Dövlət Neft Akademiyasında (ADNA) baş vermiş faciə ilə bağlı da fikirlərini bildiriblər. Millət vəkili Arzu Səmədbəyli deyib ki, Azərbaycan Dövlət Neft Akademiyasında baş verən hadisə hüquq-mühafizə orqanlarının o qədər də yüksək səviyyədə işləmədiyini göstərib: “Onlar hadisə yerinə 20 dəqiqə sonra gəldilər. Bu hadisənin bir nəfərin vasitəsilə törədildiyinə dair şübhələr var. Ona görə də araşdırma aparılması üçün xüsusi deputat istintaq komissiyası yaradılmalıdır”.

Millət vəkili İqbal Ağazadə də ADNA-dakı hadisələrlə bağlı deputat istintaq qrupunun yaradılmasını təklif edib: “Burada terror əlamətləri var”.

O, Qarabağ danışıqları ilə bağlı MM-in qapalı iclasının keçirilməsini, problemlərlə bağlı aparılan danışıqlar haqqında deputatlara məlumat verilməsini istəyib.

Deputat Mübariz Qurbanlı “ADNA-dakı hadisələrdən siyasi qazanc məqsədilə istifadə olunmamalıdır” deyərək bildirib ki, həmin hadisədən sonra istintaq qrupu yaradılıb, iş gedir və bu barədə ictimaiyyətə məlumatlar çatdırılır.

Spiker Oqtay Əsədov ADNA-da baş verən hadisə ilə bağlı aparılan istintaqın prezidentin nəzarətində olduğunu vurğulayıb: “Biz bu faciəni pisləyirik”.

Daha sonra gündəlikdəki məsələlərin müzakirəsi başlanıb.

Barak_Obama_media