Media

Ana səhifə

Media

KİV-in İnkişafına Dövlət Dəstəyi Fondunun Müşahidə Şurasının sədri və sədr müavini seçilib

26 may 2009 16:40 (UTC +04:00)

APA-nın məlumatına görə, iclasdan əvvəl Müşahidə Şurasının üzvləri Azərbaycan Prezidentinin Administrasiyasında olub, İctimai-siyasi məsələlər şöbəsinin müdiri Əli Həsənovla görüşüblər. Görüş zamanı Ə.Həsənov Müşahidə Şurası üzvlərini təbrik edib, Fondun qarşısında duran vəzifələr barədə fikirlərini bölüşüb.

Mətbuat Şurasında keçirilən iclasda Müşahidə Şurasının gündəliyinə iki məsələ çıxarılıb. Əvvəlcə Müşahidə Şurasının sədr və sədr müavinin seçilməsi məsələsi müzakirə olunub. Müşahidə Şurasının üzvü Əflatun Amaşov çıxış edərək Beynəlxalq Avrasiya Mətbuat Fondunun sədri Ümid Mirzəyevin Müşahidə Şurasına sədr, “İki sahil” qəzetinin baş redaktoru Vüqar Rəhimzadənin isə sədr müavini vəzifələrinə namizədliklərini irəli sürüb.

Şura üzvləri Ü. Mirzəyevin və V. Rəhimzadənin Müşahidə Şurasına sədr və sədr müavini seçilməsinə yekdilliklə səs veriblər.

Gündəlikdə duran ikinci məsələ Fondun fəaliyyətinin təşkili ilə bağlı olub, şura üzvləri qarşıda duran hüquqi və texniki məsələlərin həlli ilə bağlı fikirlərini bildiriblər. Fondun qeydiyyata alınması, müvafiq normativ sənədlərin hazırlanması, qurumun fəaliyyət istiqamətləri və qarşıda duran digər məsələlərin həllinə dair təkliflər müzakirə olunub.