Media

Ana səhifə

Media

APA-nın baş direktoru Avropa Şurasında bir sıra görüşlər keçirib - FOTOSESSİYA

APA-nın baş direktoru Avropa Şurasında bir sıra görüşlər keçirib - <font color=red>FOTOSESSİYA</font>

28 may 2009 18:15 (UTC +04:00)

APA-nın Avropa bürosunun xəbərinə görə, dünən V. Mahirqızı Avropa Şurasının insan haqları üzrə komissarının mətbuat katibi Stefano Montanari ilə görüşüb. Görüşdə Azərbaycan mediası ilə AŞ-nin insan haqları üzrə komissarı arasındakı əməkdaşlıq məsələləri müzakirə olunub. Azərbaycan mediası ilə əməkdaşlıqda maraqlı olduqlarını deyən S. Montanari komissar Tomas Hammarberqin diqqətində olan əsas məsələlərdən birinin də media azadlığı olduğunu vurğulayıb. Öz növbəsində V. Mahirqızı da görüş və mütəmadi əməkdaşlıq üçün təşəkkürünü bildirib, Azərbaycan və digər Cənubi Qafqaz ölkələrində medianın Avropa Şurası ilə əlaqələrinin perspektiv inkişafına dair təkliflərini çatdırıb.

Daha sonra baş direktoru Azərbaycanın Avropa Şurası yanındakı Daimi Nümayəndəliyinin rəhbəri, səfir Arif Məmmədov qəbul edib. Səfir APA-nın Avropa Şurasında büro ilə təmin olunmasının təkcə agentlik üçün deyil, ölkəmiz üçün önəmli hadisə olduğunu vurğulayıb. A. Məmmədov APA-nın Avropa bürosu ilə səmərəli əməkdaşlıq etdiklərini qeyd edib və Azərbaycanın Avropaya inteqrasiyası prosesinə medianın verə biləcəyi töhfələrdən danışıb.

Bu gün isə APA-nın baş direktoru Avropa Şurasının İctimai Əlaqələr şöbəsinin rəhbəri Ceremi Moakes (Jeremy Moakes) ilə görüşüb. Görüşdə APA-nın Avropa Şurasından foto və video görüntüləri alması, eyni zamanda Şuranın video xidmətindən ödənişsiz istifadə olunması ilə bağlı razılıq əldə olunub. Razılığa əsasən, APA bundan sonra bir neçə dildə Avropa Şurasından aldığı video görüntüləri də yayacaq.

Daha sonra V. Mahirqızı Avropa Şurası Parlament Assambleyasının mətbuat katibi Mikayela Katalano (Micaela Catalano) ilə görüşüb. Görüşdə APA ilə Parlament Assambleyası arasındakı əlaqələri daha da genişləndirməyin yolları müzakirə olunub. M.Katalano Azərbaycanın APA-nın qismində keçmiş sovet ölkələri arasından Avropa Şurasında büro alan ilk ölkə olmasının önəmini vurğulayıb, bunu həm də Avropa Şurasında Cənubi Qafqaza xüsusi önəm verilməsi ilə əlaqələndirib.

Günün ikinci yarısı isə V.Mahirqızı Avropa Şurası Yerli və Regional Hakimiyyətlər Konqresinin mətbuat katibi Dmitri Marçenkovla görüşüb. Görüşdə yerli özünü idarəetmə sistemləri ilə bağlı maarifləndirici və informativ xarakterli məlumatların mediada yer almasına ehtiyac olduğu vurğulanıb və bunun üçün əməkdaşlıq perspektivləri müzakirə olunub.

Daha sonra Avropa Şurası Kommunikasiya Direktoratının mətbuat katibi Can Fişeklə görüş keçirilib. Görüşdə Azərbaycanda internet və yazılı medianın üzləşdiyi problemlər, gələcək perspektivlər barədə müzakirə aparılıb.

V. Mahirqızı daha sonra Avropa Şurası Venesiya Komissiyasının mətbuat katibi Tatyana Mışelova ilə görüşüb. T. Mışelova APA-nın Avropa Şurasında bürosunun fəaliyyətə başlamasının mütəmadi əməkdaşlıq üçün önəmli olduğunu vurğulayıb. Xanım Mışelova Venesiya Komissiyasının həmişə mediaya açıq olduğunu və məlumatlarının mütəmadi olaraq yayılmasında maraqlı olduqlarını da qeyd edib.

Öz növbəsində V. Mahirqızı bütün görüşlərində qəbula və APA-ya olan yüksək münasibətə görə təşəkkürünü bildirib. Baş direktor agentliyin Avropa Şurası ilə daha sıx əməkdaşlıq etməkdə maraqlı olduğunu bildirib.

Qeyd edək ki, səfər AŞ-nin Kommunikasiya Direktorluğunun dəvəti ilə həyata keçirilir.

Sabah V. Mahirqızının AŞ-nin Kommunikasiya Direktorluğu mətbuat katiblərinin rəhbəri Allun Dreyk, Avropa İnsan Haqları Məhkəməsinin mətbuat katibi Stefano Piedimonte və Strasburqdakı “Azərbaycan Evi”nin rəhbəri Mustafa Alınca ilə görüşləri planlaşdırılıb.

Qeyd edək ki, APA keçmiş MDB məkanından AŞ-da ofislə təmin olunan ilk və yeganə agentlikdir. Şurada Türkiyənin NTV kanalı, “Reuters”, “Frans-Press”, ANSA, dpa kimi dünyada və müxtəlif regionlarda tanınmış 13 media qurumunun ofisi var ki, onlardan da biri APA-dır.