Media

Ana səhifə

Media

Vüsalə Mahirqızı: “Avropa Şurasında APA-ya büro verilməsini təkcə bizim üçün deyil, Azərbaycan üçün də böyük hadisə kimi qiymətləndirirlər” - FOTOSESSİYA

Vüsalə Mahirqızı: “Avropa Şurasında APA-ya büro verilməsini təkcə bizim üçün deyil, Azərbaycan üçün də böyük hadisə kimi qiymətləndirirlər” - <font color=red>FOTOSESSİYA</font>

01 iyun 2009 12:55 (UTC +04:00)

- Avropa Şurasına səfərinizin məqsədi nə idi və səfər zamanı hansı görüşləriniz oldu?

- Səfər Avropa Şurasının İnformasiya və Kommunikasiya Direktorluğunun dəvəti ilə həyata keçirildi. Səfər həm Avropa Şurası ilə tanışlıq xarakteri daşıyırdı, həm də APA-nın Avropa Şurasında ofisinin açılışı ilə bağlı idi. Avropa Şurasının mərkəzi ofisində APA-ya büro verilib və orada hər kəs xüsusi vurğulayırdı ki, bu təkcə APA üçün deyil, Azərbaycan üçün böyük hadisədir. Azərbaycanın Avropa Şurası yanındakı Daimi Nümayəndəliyinin rəhbəri, səfir Arif Məmmədov da məni qəbul edərkən eyni fikirləri söylədi. Çünki APA MDB məkanında Avropa Şurasında büro alan ilk media qurumudur. Avropa Şurasının mərkəzi binasında ümumilikdə 13 media qurumunun ofisi var, onlardan da biri bizimdir. Orada Türkiyənin NTV telekanalı, İtalyanın ANSA agentliyi, Almaniyanın DPA agentliyi, “Reuters”, “France Presse” və digər media qurumlarının ofisləri mövcuddur. APA-nın ofisi də bu sıradadır. Ofis texniki baxımdan bütünlüklə təchiz edilib, hazırda bizim Şuradakı əməkdaşımız Avropa Şurasının bütün qurumlarına birbaşa daxil olmaq imkanına malikdir. Təbii ki, bu bizim üçün böyük uğurdur və oradakı bütün görüşlərdə də vurğulanırdı ki, APA-nın belə bir ofis alması həm Azərbaycana olan böyük bir marağın, həm də APA-ya olan hörmətin təzahürüdür. Çünki APA müstəqil mövqeyi ilə bu etimadı qazanıb. Eyni zamanda bizim üstünlüklərimizdən biri də Avropa Şurasının əsas dillərində - fransız və ingilis dillərində yayımımızın olmasıdır. Həmçinin, Qafqazda ilk və yeganə videogörüntülü yayımla məşğul olan agentlik də bizik. Görüşlərdə vurğulayırdılar ki, APA Şuradan alınan xəbərlərə şərh vermədən, təhrif etmədən yayır. Onlar bizim xəbərləri izlədiklərini bildirirdilər və konkret xəbərlərdən sitat gətirirdilər. Quruma üzv olan 47 ölkənin hər birində Avropa Şurası ilə bağlı dərc olunan, yayılan yazıların monitorinqi aparılır. Bu monitorinq zamanı yazdıqlarının çəkisi ağır gələn qurumlardan biri də məhz APA olub. Çünki APA Avropa Şurasının fəaliyyətini mütəmadi işıqlandırır, həm də bizim yaydığımız informasiyalar ölkənin və regionun digər media qurumlarında yayılır. Təbii ki, bu uğurların əldə edilməsində şuradakı əməkdaşımız Fuad Qulubəylinin də rolu olub ki, belə bir büro ala bilmişik. Bu büronun alınmasına onun orada davamlı işləməyi, insanlarla qurduğu münasibət də yardım edib.

- Səfərin APA-nın bundan sonrakı fəaliyyətinə hansısa təsiri olacaqmı?

- Biz operativ və qərəzsiz xəbərçilik prinsiplərimizi həmişə davam etdiririk. Amma təbii ki, belə uğurlar daha da yüksəlmək üçün yardım edir. Səfər çərçivəsində bundan sonra APA-nın Avropa Şurasından pulsuz foto və video materiallar alması barədə razılıq əldə olunub. Bizim bundan sonra Avropa Şurasının video xidmətindən şura daxilində pulsuz istifadə etmək imkanımız da olacaq.

Eyni zamanda Avropa Məhkəməsi, Yerli Regional Konqreslər və digər qurumlarla müəyyən razılaşmalar əldə edildi ki, bundan sonra daha sıx əməkdaşlıq edək, daha çox xəbərlər yayaq. Təbii ki, bunlar müsbət addım idi. Orada da bildirdilər ki, Azərbaycandan indiyə qədər hansısa media rəhbərinin belə silsilə görüşləri keçirilməyib.

- Avropa Şurasının rəsmiləri ilə görüşlərdə hər hansı siyasi müzakirələr aparıldımı?

- Yox. Mən ümumiyyətlə, görüşlərdə siyasi müzakirələr aparmırdım. Hətta səfər proqramım hazırlananda belə, yalnız media mövzusunda müzakirələr aparmaq, xüsusilə də APA-nın Avropa Şurası ilə əməkdaşlığının perspektivləri ilə bağlı danışmaq istədiyimi bildirmişdim. Mənim orada Avropa Şurasında təmsil olunan bir neçə nəfərlə ayaqüstü söhbətlərim oldu, amma bu görüşlər səfər proqramıma daxil deyildi. Təbii ki, media azadlığı ilə bağlı müzakirələr olurdu, mən eyni zamanda Azərbaycan Mətbuat Şurasının üzvüyəm, buna görə də medianın vəziyyəti ilə bağlı fikir mübadiləsi aparılırdı. Həmçinin KİV-in İnkişafına Dəstək Fondu ilə bağlı, həbsdə olan jurnalistlər məsələsi, medianın iqtisadi vəziyyəti, xüsusilə Azərbaycanda internet medianın problemləri ilə bağlı müzakirələr olurdu. Amma mənim üçün bütün görüşlərdə prioritet təmsil etdiyim qurumun, yəni APA-nın inkişafı ilə bağlı müzakirələr idi. Bir media nümayəndəsi kimi digər məsələlərin də müzakirəsi qaçılmaz idi.

- Erməni diasporunun güclü olduğu ölkələrdən biri Fransadır. Azərbaycanın media qurumunun bu ölkədə fəaliyyət göstərməsinə hər hansı problemlər yaradıla bilərmi?

- Mən buna inanmıram. Ümumiyyətlə, Fransa tolerant bir ölkədir və Avropa Şurasının özündə bizə münasibət sözün həqiqi mənasında yüksəkdir. Qurumun içərisində Azərbaycan mediasının nüfuzu, APA-nın nüfuzu çox güclüdür. Avropa Şurasındakı bir çox görüşdə vurğulayırdılar ki, Azərbaycan qurum üçün çox prioritet ölkədir. Müşahidələrimə görə, Şura digər sahələrdə olduğu kimi medianın inkişafı və müstəqilləşməsi sahəsində də Azərbaycanla sıx əməkdaşlıqda maraqlıdır. Məhz bizim Şurada büro ilə təmin olunmağımız da bunun göstəricisidir. Bunu görüşdüyüm adamlar da sıx-sıx vurğulayırdılar.

Hər halda kifayət qədər nüfuzlu bir beynəlxalq təşkilatda APA-ya olan belə yüksək münasibət çox məmnunedicidir. Avropa Şurasında mənim kiməsə APA barədə məlumat verməyimə ehtiyac yox idi. Onlar özləri mənə bizim agentlik barədə danışırdılar. Bütün həmkarlarıma təmsil etdikləri qurum barədə belə nüfuzlu və məmnuniyyət dolu rəylər eşitməklərini arzulayıram.

Vüsalə_AŞ