Media

Ana səhifə

Media

“Azərbaycanda internet mediasının tənzimlənməsi” mövzusunda konfrans keçirilib

04 iyun 2009 09:46 (UTC +04:00)

Bakı. Elbrus Seyfullayev - APA. Milli Televiziya və Radio Şurası (MTRŞ) və Avropa Şurasının (AŞ) birgə təşkilatçılığı ilə “Azərbaycanda internet mediasının tənzimlənməsi” mövzusunda konfrans keçirilib. APA-nın xəbərinə görə, tədbirdə çıxış edən Prezident Administrasiyasının ictimai-siyasi şöbəsinin müdiri Əli Həsənov interneti özbaşına gəzən pişiyə bənzədib. O bildirib ki, internet bu gün istədiyi yerə sərhəd tanımadan gedə bilir: “Bunun sonu nə olacaq? İnternetin yaratdığı problemlər artıq dünya dövlətlərini narahat etməyə başlayıb. Hesab edirəm ki, internetin tənzimlənməsi lazımdır”.

Rabitə və informasiya texnologiyaları nazirinin müavini İltimas Məmmədov ölkədə informasiya-kommunikasiya texnologiyalarının inkişafı ilə əlaqədar işlər görüldüyünü deyib: “Artıq bütün ölkə boyu 2 min km-dən çox optik kabel çəkilib. Sürətli internetin təmin olunması üçün müəyyən addımlar atılır. Azərbaycanda avtomobildə hərəkət edərkən də internetdən istifadə etmək imkanı var. Bu inkişaf davam etdirilməlidir”.

APA İnformasiya Agentliyinin baş direktoru Vüsalə Mahirqızı bəyan edib ki, Azərbaycanın internet mediası fors-major hallara hazır deyil. Onun sözlərinə görə, hazırda Azərbaycanda internet mediası texniki problemlər, kadr çatışmazlığı, plagiatlıq, domen tapılması, qiymət bahalığı və digər ciddi problemlərdən əziyyət çəkir: “Təsəvvür edin, Milli Məclis aylıq qəzetləri akkreditasiyadan keçirir, lakin internet portallarını yox. Doğrudan da internet media qurumları ilə bağlı ayrıca struktur yaradılmalıdır. Bu gün ölkədə Mətbuatın İnkişafına Dövlət Dəstəyi Fondu yaradılıb. Bu fondun vəsaitlərindən internet mediasına ayrılmalıdırmı? Ümumiyyətlə, internet mediası KİV hesab olunur, ya yox? Bu məsələlərə aydınlıq gətirilməlidir”.

Milli Televiziya və Radio Şurasının sədri Nuşirəvan Məhərrəmli də internet sahəsində tənzimlənmənin və müəyyən nəzarətin həyata keçirilməsinin vacibliyini vurğulayıb: “Normal cəmiyyətdə bu nəzarət problem hesab olunmamalıdır. Mən interneti texniki vasitə kimi görürəm. Bu, ayrıca media vasitəsi deyil, sadəcə, fəaliyyət sahəsidir”.

Azərbaycan İnternet Forumunun rəhbəri Osman Gündüz ölkədə fəaliyyət göstərən 10-15 populyar xəbər portalının bütün internet xəbər məkanına nəzarət etdiyini söyləyib. Onun fikrincə, internet mediasının problemi birbaşa ölkədə internetin keyfiyyəti ilə bağlıdır: “Bu sahədə qiymətlər endirilməli, kadr problemləri həll edilməli, internet mediasının inkişafına dair dövlət proqramı qəbul olunmalıdır”.

“Lent.az” xəbər portalının rəhbəri Qabil Abbasoğlu son 5 ildə ölkədə internet mediasının inkişafı istiqamətində irəliləyişlərə nail olunduğunu qeyd edib. Onun sözlərinə görə, internet mediasını yox, internetin özünü tənzimləmək lazımdır: “Ölkədə digər KİV sahələrinə aid strukturlar olduğu kimi, internet mediası ilə bağlı da ayrıca qurum fəaliyyət göstərməlidir”.