Media

Ana səhifə

Media

Respublika Baş Prokurorluğunun açıqlamaları ilə bağlı APA-nın bəyanatı

12 iyun 2009 16:18 (UTC +04:00)

Xəbər Respublika Baş Prokurorluğu və Daxili İşlər Nazirliyinin 2003-cü və 2004-cü illərdə törədilmiş ağır cinayət hadisəsi ilə əlaqədar yaydıqları rəsmi məlumatın araşdırılması zamanı ortaya çıxıb.

Lakin xəbərin yayılmasından bir gün sonra Respublika Baş Prokurorluğunun mətbuat xidməti agentliyin rəhbərliyinə təkzib məktubu ünvanlayıb. Prokurorluq faktiki olaraq məhz agentliyin işgüzar nüfuzuna zərbə vurmaq məqsədi ilə APA-nın həmin təkzib mətnini yaymasını gözləmədən eyni məktubun surətini digər KİV-lərə də yayaraq, rəqiblərimizin bu xəbərdən bizim əleyhimizə istifadə etmələrinə imkan yaradıb.

Agentlik bu hadisəni təəssüflə qarşılasa da, məsələyə daha çox peşəkar prinsipdən yanaşaraq, əlavə heç bir açıqlama ilə çıxış etməyib.

APA bəyan edir ki, həmin xəbər agentliyə bir neçə gün öncə daxil olub, həmin vaxt xəbəri qeyri-rəsmi təsdiq edən Baş Prokurorluğun mətbuat xidmətinin rəhbəri Eldar Sultanov bir neçə gün gözləməyi lazım bilib. Hətta xəbər yayılan gün o, agentliklə əlaqə saxlayaraq xəbərdə bir neçə düzəliş də edib, heç bir təkzib tələbi ilə çıxış etməyib. Lakin iyunun 9-da təkzib açıqlaması yayıb.

Bu il iyunun 11-də APA 2003-cü və 2004-cü illərdə törədilmiş ağır cinayət hadisəsi ilə əlaqədar Gəncə şəhərində bir neçə vəzifəli şəxsin istintaqa cəlb edilməsi ilə bağlı cinayət işinin müstəntiqinin dəyişdirilməsi barədə xəbər yayıb. Həmin vaxt əməkdaşlarımızın və rəhbərliyin mətbuat xidmətinin rəhbəri Eldar Sultanovla əlaqə saxlamaq cəhdləri nəticə verməyib. Müstəntiq Vüqar Nəsibov işi apardığını təkzib etməyib, lakin istintaqın gedişi ilə bağlı ətraflı məlumat verməkdən imtina edib.

Lakin bu gün müstəntiq Nadir Mirzəyev başqa bir KİV-də görünərək, yenə də APA-nın nüfuzuna xələl gətirəcək ifadələr səsləndirməklə agentliyin məlumatını təkzib etməyə çalışıb. O da bizə bəllidir ki, öz təşəbbüsü ilə Nadir Mirzəyevin hansısa KİV-də görünməyi mümkün deyil.

APA baş verənlərdən təəssüfləndiyini, bunun heç bir əməkdaşlıq prinsiplərinə uyğun gəlmədiyini bildirməklə yanaşı, Baş Prokurorluq tərəfindən agentliyə olan bu yanaşmanı anlamadığını qeyd edir. Agentliyin nailiyyətlərinin, beynəlxalq nüfuzunun artdığı bir vaxtda bütün cəhdlərlə xəbərlərimizə etimadsızlıq yaradılmasının səbəbini öyrənmək bizim üçün də maraqlı olardı.

Eyni zamanda xüsusilə qeyd olunmalıdır ki, bu hadisə ilə bağlı demək olar ki, ölkənin əksər KİV-ləri ən müxtəlif xəbər və versiyaları daha kəskin şəkildə yazmaqda davam etsələr də, məhz APA-nın hədəfdə olması bizdə suallar yaratmaya bilmir.

APA bir daha baş verənlərdən təəssüfləndiyini bildirərək, prinsipial xəbərçilik mövqeyindən çəkilmək niyyətində olmadığını bir daha vurğulamaqla Respublika Baş Prokurorluğu ilə əməkdaşlığı davam etdirmək əzmini və niyyətini bəyan edir.