Media

Ana səhifə

Media

Tərxis Olunmuş Hərbiçilərin Gəncləri Maarifləndirmə İctimai Birliyində APA-nın baş direktoru ilə görüş keçirilib - FOTO

Tərxis Olunmuş Hərbiçilərin Gəncləri Maarifləndirmə İctimai Birliyində APA-nın baş direktoru ilə görüş keçirilib - <font color=red>FOTO</font>

19 iyun 2009 16:42 (UTC +04:00)

Bakı. Ramil Məmmədli – APA. Bu gün Tərxis Olunmuş Hərbiçilərin Gəncləri Maarifləndirmə İctimai Birliyində qurum üzvləri “Azəri-Press” İnformasiya Agentliyinin (APA) baş direktoru Vüsalə Mahirqızı ilə görüşüblər. APA-nın məlumatına görə, mətbuat orqanlarının rəhbərləri ilə görüş çərçivəsində keçirilən tədbirdə Azərbaycan Silahlı Qüvvələrindəki vəziyyət, mətbuatın orduda baş verən hallara reaksiyası, gənclərin vətənpərvərlik ruhunda tərbiyəsi yönümündə görülməli işlər, hərbi sistemlə bağlı ictimai fikrin formalaşdırılması və digər məsələlər müzakirə mövzusu olub.

Birliyin sədri Emin Həsənli deyib ki, mətbuat vasitələri içərisində APA-nın ordu ilə bağlı mövqeyi həmişə təqdirəlayiq hesab olunmalıdır. Onun sözlərinə görə, APA fəaliyyəti boyunca Azərbaycan Silahlı Qüvvələrinin təbliği ilə məşğul olub, məsələlərə jurnalist peşəkarlığı ilə yanaşıb.

APA-nın baş direktoru Vüsalə Mahirqızı təmsil etdiyi qurumun ordu ilə bağlı mövqeyini açıqlayıb. O bildirib ki, APA həmişə Azərbaycan Ordusunun güclü və nizami olmasını istəyən mətbuat qurumudur. V. Mahirqızı Tərxis Olunmuş Hərbiçilərin Gəncləri Maarifləndirmə İctimai Birliyinin mətbuatla ordu arasında körpü yaratmaq cəhdini də alqışlayıb.

Baş direktorun sözlərinə görə, 5 il öncə mətbuat nümayəndələrinin səngərlərə səfərləri ciddi problem idisə, artıq indi bu hal birliyin fəaliyyəti nəticəsində adiləşib. Görüşdə bir sıra təkliflərlə də çıxış edən V. Mahirqızı bu layihələrin həyata keçməsində APA-nın dəstək verəcəyini qeyd edib: “Hərbi vətənpərvərlik ruhunun gənclərə orta məktəbdən aşılanması, örnək olası insanlar – döyüşçülər barəsində materialların hazırlanması çox əhəmiyyətlidir. Həmçinin ordu ilə bağlı yazılarda mətbuat çox diqqətli olmalıdır. İlk növbədə insan şərəf ləyaqətini alçaldan yazılar qəzet səhifələrinə çıxmamalıdır”.

V. Mahirqızı tədbir iştirakçılarının suallarını da cavablandırıb.