Media

Ana səhifə

Media

İctimai Televiziyanın baş direktoru İsmayıl Ömərov "Zirvədəkilər-2008" mükafatına layiq görülüb

20 iyun 2009 11:27 (UTC +04:00)

Bakı-APA. Dünən Beynəlxalq “First Business” dərgisinin "Zirvədəkilər-2008" mükafatının təqdimat mərasimi keçirilib. APA-nın xəbərinə görə, təqdimat mərasiminə Türkiyənin mədəniyyət və turizm naziri Ərtoğrul Günay, bir çox ölkədən iş adamları, diplomatlar, ziyalılar və sənətçilər qatılıb.
Azərbaycanın İctimai Televiziyasının baş direktoru İsmayıl Ömərov da "Zirvədəkilər-2008" mükafatına layiq görülənlər sırasında olub. İ. Ömərov “Ortaq türk televiziyasının qurulmasındakı nailiyyətlərinə görə” “Türk dünyası və türk mədəniyyətlərinə xidmət” ödülünə layiq görülüb.
Təqdimat mərasimində qeyd olunub ki, İTV kadrlarının professionallığı, yayım əxlaqı və ruhu ilə Azərbaycanın milli televiziyasıdır: ‘Altaydan Anadoluya, Qafqazdan Orta Asiyaya qədər bütün türk dünyasının problemləri, onların tarixləri, şanlı səhifələri İTV-nin ayrı-ayrı proqramlarında öz əksini tapır. Bu televiziyanın proqramları Azərbaycanla yanaşı dünyanın bır çox ölkələrində də böyük maraqla izlənilir’.
Mərasimdə İTV-nin bu fəaliyyətini TRT ilə birgə davam etdirdiyi, “TRT AVAZ”la hazırlanan ortaq proqramların da bu baxımdan xüsusi önəm təşkil etdiyi vurğulanıb.
Bu ortaq layihəyə görə, “TRT AVAZ”ın koordinatoru Adnan Suer də xüsusi diplomla təltif olunub.
Qeyd edək ki, İ. Ömərov bu ödülə artıq ikinci dəfə layiq görülüb.
Xatırladaq ki, yazıçı Elçin Əfəndiyev və Azərbaycanın Türkiyədəki baş konsulu Səyyad Salahlı da “Türk dünyası və türk mədəniyyətinə xidmətlərinə görə” "Zirvədəkilər 2008" ödülünə layiq görülüblər.