Media

Ana səhifə

Media

Azər Həsrət: “Jurnalistikadan getməyim mümkün deyil”

29 iyul 2009 12:21 (UTC +04:00)

- Hazırda hansı fəaliyyətlə məşğulsunuz? Jurnalistikadan uzaqlaşmısınızmı?

- Jurnalistika elə bir peşədir ki, bu işə başlayan ömrünün sonuna kimi bu peşə ilə məşğul olmaq məcburiyyətində qalır. Mən də ara-sıra yazılar yazıram. Bununla bərabər türk dünyası ilə bağlı xəbərlər yayan internet saytına redaktorluq edirəm. Bu saytda biz daha çox türk dünyasının ayrı-ayrı ölkələrində gedən proseslərlə bağlı xəbərlər yayırıq, o xəbərlərin dili dəyişmir, yalnız latın əlifbasında yayılır. Məqsədimiz türk dillərini, ləhcələrini bir araya gətirmək və bunların yaxınlaşdırılmasına, gələcəkdə ortaq türk dilinin formalaşmasına öz töhfəmizi verməkdir. Mərkəzi qərargahı Türkiyənin Bursa şəhərində yerləşən “Yeddi Dövlət - Bir Millət” Kültür və Dayanışma Dərnəyinin türk cümhuriyyətləri üzrə baş təmsilçisiyəm. Bu dərnək yeni qurulmasına rəğmən türk cümhuriyyətlərində çox geniş işlər planlaşdırır və artıq bu işlərin müəyyən hissəsi görülüb. Dərnəyin məqsədi ondan ibarətdir ki, türk cümhuriyyətləri arasında yaxınlaşmanı, inteqrasiyanı sürətləndirsin və gələcəkdə - əlbəttə ki, dövlətlərimizin siyasətini müəyyən edən şəxslərin məsləhət biləcəyi bir zamanda - Avropa Birliyi tipində dövlətlər birliyinin yaranmasına yardımçı olsun. Təbii ki, bu işlər dərnək və yaxud ictimai təşkilatlar səviyyəsində həll olunacaq məsələ deyil. Sadəcə, biz ictimai rəylə işləyirik, ictimai rəyi buna hazırlayırıq. Hesab edirik ki, günün birində istər Türkiyənin, istər Azərbaycanın prezidentləri bir araya gəlib, belə birliyin yaranmasına qərar vermək fikrinə düşsələr, o zaman ictimai rəy bu məsələni rahat şəkildə qəbul edə bilməlidir. Bəllidir ki, vahid mövqedən çıxış etmək məsələsində Azərbaycanla Türkiyənin problemi yoxdur. Amma Orta Asiyadakı 4 türkdilli dövlət haqqında bunu demək mümkün deyil. Çünki orada bir qədər başqa təsirlər və başqa meyllər var. Bu baxımdan həmin cümhuriyyətlərin Azərbaycan, Türkiyə və Quzey Kıbrısla hansısa birliyə qoşulması indiki dövrdə mümkün görünmür. Amma biz düşünürük ki, gələcəkdə - 10 ildən, 20-30 ildən sonra bu respublikalar arasında yaxınlaşma olacaq və türk cümhuriyyətlərinin hər hansı formada birliyinin qurulması istiqamətində addımlar atılacaq. Bu səbəblə indidən çalışırıq ki, həmin vaxt bu ölkələrdə yaşayan xalqların bir-birinə yaxınlaşması, inteqrasiya məsələlərində problemlər meydana çıxmasın. Dərnək məhz bu istiqamətdə fəaliyyət göstərir. Məqsəd dövlətlərin bütün müstəqil atributlarını saxlamaq şərtilə Avropa Birliyi tipində Türk Dövlətləri Birliyinin yaradılmasına yardımçı olmaqdır.

- Redaktoru olduğunuz sayt xəbər saytıdır, yoxsa ideoloji təbliğat aparmaq məqsədi daşıyır?

- Saytımız (www.yalquzaq.com) sırf xəbər saytıdır. Türk dünyasının müxtəlif yerlərindən gündəlik xəbərlər alırıq və bu xəbərləri uyğur, qazax, qırğız, özbək, türkmən, Azərbaycan, Anadolu, Krım, qaqauz türkcəsində yayımlayırıq. Ən xırda türk toplumlarından da xəbər almağa çalışırıq. Bundan başqa, bizim www.yedidevletbirmillet.com saytımız da var. Bu, artıq dərnəyin saytıdır. Dərnəyin saytında da xəbərlər tərcüməsiz yayılır. Türk dünyasının əksər yerlərində olmuşam, şəxsən mən uyğur türkcəsi ilə Azərbaycan türkcəsi arasındakı yaxınlığı hiss edirəm, yaxud özbəklə Azərbaycan, Krım, Kazan tatarcası arasında yaxınlıq var. Yəni türk dilləri arasında elə bir ciddi fərq yoxdur. Sadəcə, müəyyən zaman lazımdır ki, insanlarımız bu dillərə alışsınlar. Alışdıqdan sonra artıq bir-birimizlə rus, ingilis, yaxud başqa bir dildə ünsiyyət qurmağımıza ehtiyac qalmayacaq.

- Orta Asiya türk dövlətlərində dərnəklə əməkdaşlıq edənlər varmı?

- Bəli. Çox sevindiricidir ki, dərnək qısa müddətdə Orta Asiya respublikaları ilə də əlaqələr qurub. Bir neçə gün əvvəl biz Özbəkistanda nümayəndəmizi müəyyənləşdirdik. Həmin şəxs Özbəkistan üzrə fəaliyyət göstərəcək. Qazaxıstan və Qırğızıstanla da ünsiyyət qurmuşuq, Türkiyədə təhsil alan tələbələr, iş adamları ilə əlaqələr yaradılıb. Türkmənistanın daxili xüsusiyyətləri nəzərə alınır və orada iş qurmaq bir qədər çətin görünür. Amma orada da ciddi problemlə qarşılaşacağımızı düşünmürük. Çünki yenə də qeyd edirəm ki, bizim missiyamız türk cümhuriyyətlərinin inkişafına, inteqrasiyasına, dünyada söz sahibi olmasına xidmət edir. Bu baxımdan da hökumətlərin bizim bu addımlarımıza qarşı çıxacağını düşünmürəm.

- Siz jurnalist təşkilatına da rəhbərlik edirdiniz. Həmin qurum fəaliyyət göstərirmi?

- Orta Asiya və Güney Qafqaz Söz Azadlığı Şəbəkəsi təşkilatı vardı və o, uzun müddət fəaliyyət göstərdi, beynəlxalq mükafat aldı. Bu təşkilatın məqsədi xüsusən də Orta Asiya ölkələrində söz azadlığının qorunmasına xidmət etmək idi. Amma mən yəqin ki, bu fəaliyyəti bir kənara qoymalı olacağam. Çünki bayaq qeyd etdiyim kimi, biz hökumətləri, prezidentləri, dövlətləri tənqid etmək yolu tuta bilmərik. Orta Asiya və Güney Qafqaz Söz Azadlığı Şəbəkəsi Orta Asiyadakı hökumətləri qıcıqlandıra biləcək bir təşkilat olduğundan mən bu qurumdan uzaqlaşmaq fikrindəyəm. Əgər uyğun bir nümayəndə tapıb o vəzifəyə təyin edə bilsək, həmin təşkilatdan uzaqlaşacağam. Amma ümumi götürdükdə jurnalistikadan getməyim mümkün deyil. Fəaliyyətim birbaşa jurnalistika ilə bağlıdır və bu sahə elə bir peşədir ki, ayrılmaq mümkünsüzdür. Yəni yazmaq istəyən, fikrini söyləmək istəyən adam mütləq jurnalistika ilə məşğul olmaq məcburiyyətindədir.

- Dərnəyinizə türkdilli ölkələrin dövlət rəsmilərindən qatılanlar varmı?

- Dərnək Türkiyədə rəsmən qeydiyyatdan keçib və hüquqi şəxs kimi fəaliyyətə başlayıb. Dərnək qarşısına məqsəd qoymayıb ki, mütləq rəsmi şəxsləri öz sıralarına cəlb etsin. Mən son iki həftə ərzində Azərbaycanda bir sıra görüşlər keçirmişəm - istər hökumətə yaxın adamlar, istərsə də müstəqil şəxslərlə. Onlar bizim ideyamız dəstəkləyir. Türkiyədə dərnəyin üzvləri hökumət nümayəndələri və parlamentdə təmsil olunan partiyaların rəhbərləri ilə görüşlər keçirir. Bu görüşlər də müsbət nəticə verir və hər kəs məqsədimizi dəstəkləyir.