Media

Ana səhifə

Media

“Yeni Müsavat” qəzetinin redaksiyasının yerləşdiyi binanın su və kanalizasiya sistemi ilə bağlı problem yaranıb

08 avqust 2009 10:40 (UTC +04:00)

Bakı. Elnur Məmmədli – APA. “Yeni Müsavat” qəzetinin redaksiyasının yerləşdiyi Bakının Nizami rayonu Rüstəm Rüstəmov küçəsi 2528-ci məhəllə ünvanındakı 12 mərtəbəli binanın su xətti və kanalizasiya sistemi ilə bağlı problem yaranıb.Bu barədə APA-ya qəzetin redaktoru Azər Ayxan məlumat verib. Onun sözlərinə görə, avqustun 7-dən rayonun Mənzil Kommunal Təsərrüfat Birliyinin işçiləri əraziyə gələrək, su xəttinin, kanalizasiya sisteminin qanunsuz olaraq birləşdirildiyini deyiblər: “ Kanalizasiya xətti olan ümumi qovşaq isə binanın ümumi girişi olan pilləkənin altındadır və o pilləkən dağıdılsa, o zaman binaya giriş mümkün olmayacaq”. A. Ayxan bildirib ki, onlar MKTB işçilərinin ilə danışıqlar aparıblar və sənədləşməni həyata keçirməyi təklif ediblər: “Uzun mübahisələrdən sonra bina rəhbərliyinə avqustun 10-na kimi vaxt verdilər”.

Nizami rayon icra başçısının birinci müavini Ərrəhman Həsənov isə APA-ya açıqlamasında bildirib ki, Rüstəm Rüstəmov küçəsi 2528-ci məhəllə ünvanındakı bina sənədləşməyib: “Dövlət komissiyası həmin binanı qəbul etməyib, amma binada yaşayışa, fəaliyyət göstərilməyə imkan yaradılıb”.

Ə. Həsənov məsələnin qanuna uyğun olaraq həll ediləcəyini bildirib.