Media

Ana səhifə

Media

Azərbaycan Mətbuat Şurasının Şikayətlər üzrə Komissiyasının iclası keçirilib

20 avqust 2009 12:51 (UTC +04:00)

Bakı. Elnur Məmmədli – APA. Azərbaycan Mətbuat Şurasının Şikayətlər üzrə Komissiyasının iclası keçirilib. Şuranın mətbuat xidmətindən APA-ya daxil olan məlumata görə, iclasda “İnam” Plüralizm Mərkəzinin sədri Vahid Qazinin “Azadlıq” qəzeti ilə bağlı şikayətinə baxılıb.
Şura üzvləri bildiriblər ki, hər hansı nəşrin, yaxud köşə yazarının digər müəllifləri müxtəlif məsələlərin işıqlandırılmasında məhz onların mövqelərinə, baxışlarına uyğun fikirlər yer almadığına görə qınaq hədəfinə çevirməsi məqbul hal sayıla bilməz. “Azadlıq” qəzetində dərc olunan köşə yazısında V.Qazi barədə təhqiramiz fikirlər işlədildiyi bildirilib və bu, etik prinsiplərin pozulması kimi dəyərləndirilib. Komissiya nəşrə təkzib verilməsini tövsiyə edib. İclasda həmçinin “Azadlıq” qəzetində Ağdam rayonu ilə bağlı məqalənin “Azərbaycan Jurnalistlərinin Peşə Davranışı Qaydaları”nın bir sıra bəndlərinin tələbləri gözlənilmədən dərc olunduğu bildirilib. Araşdırma aparılmadan, balans prinsipi gözlənilmədən ittiham xarakterli fikirlərin təqdimatı qüsurlu hal sayılıb. Tərəflər razılığa gəliblər ki, yazıda adı hallandırılan şəxsin məktubunun dərci ilə əsl həqiqətlərə aydınlıq gətirilə bilər.
İclasda “Reytinq” qəzetində “Döyüş və söyüş vərəqələri” sərlövhəli köşə yazısı müzakirə edilib və komissiya qəzetdə orduda xidmətdən yayınmaya, itaətsizliyə çağırışa yönələn fikirlərin yer almasının yolverilməz olduğunu bildirib. Nəşr rəhbərliyinə belə halları təkrarlamamağı tövsiyə edib.
Respublika Səhiyyə Nazirliyi Elmi-Tədqiqat Mamalıq və Ginekologiya İnstitutunun “Yeni xəbər” qəzetinə qarşı şikayətinə baxılarkən vurğulanıb ki, nəşrin həmin müəssisə ilə bağlı yazısında peşəkarlığın tələbləri gözlənilmədiyindən yanlışlığa yol verilib. Qəzetə institutun mövqeyini əks etdirən məktubunun dərci tövsiyə olunub.