Media

Ana səhifə

Media

Mətbuat Şurası Şikayətlər üzrə Komissiyasının iclası keçirilib

17 sentyabr 2009 11:01 (UTC +04:00)

Bakı-APA. Azərbaycan Mətbuat Şurası Şikayətlər üzrə Komissiyasının iclası keçirilib. Şuradan APA-ya verilən məlumata görə, MŞ sədrinin müavini Umud Rəhimoğlunun rəhbərlik etdiyi komissiyanın üzvləri 5 müraciəti araşdıraraq müvafiq rəylər çıxarıblar.
Yeni Azərbaycan Partiyasının «Azadlıq» qəzetinə qarşı şikayətinə baxılıb. YAP-ın mətbuat xidmətinin rəhbəri Hüseyn Paşayev bildirib ki, nəşrin şikayət doğuran «YAP sədri böyrəyini satır» (23-24 avqust 2009-cu il) sərlövhəli məqaləsi yalnız müxbir fantaziyasının məhsuludur və orada göstərilənlər həqiqəti əks etdirmir. Komissiya qəzetə növbəti sayında təkzib verməyi və qarşı tərəfdən üzr istənilməsini tövsiyə edib.
Sonra Türkiyənin Azərbaycandakı Səfirliyinin «Təzadlar» qəzetində gedən «Hulusi Kılıç baş redaktorlara rüşvət təklif edib?» və «Hadisə Serj Sarkisyanın oğluna ərə gedir?» (hər iki yazı 5 sentyabr 2009-cu il) sərlövhəli yazılarla bağlı şikayətinə baxılıb. Səfirliyin mətbuat müşaviri Bülənt Uğur bildirib ki, «Təzadlar» qəzetində gedən məqalə təkcə səfirliyi nüfuzdan salmağa deyil, eyni zamanda qarşılıqlı əməkdaşlığa da zərbə vurmağa yönəlib. Məsələ ilə bağlı iclasda səslənən «Təzadlar»ın adının MŞ-nin «reket» KİV-lər üçün tərtib etdiyi siyahıya salınması barədə təklifin lehinə 6, əleyhinə 1 səs verilib. Komissiya «Təzadlar» qəzeti barədə müvafiq qərarın qəbulu üçün çıxardığı rəyin Şuranın İdarə Heyətinə təqdim olunmasını məqsədəmüvafiq sayıb.
İclasda müzakirə edilən daha bir məsələ ilə əlaqədar bildirilib ki, «Reytinq» qəzetindəki «Qadağan olunmuş meyvə» (6 sentyabr 2009-cu il) sərlövhəli yazıda respublikanın xalq artistləri Arif Babayevin və Mənsum İbrahimovun şərəf və ləyaqətinə toxunan, işgüzar nüfuzlarına xələl gətirən fikirlər qabarıq formada verilib, açıq təhqirlər yer alıb.
Komissiya üzvləri belə rəyə gəliblər ki, «Reytinq» qəzeti xalq artistləri A.Babayev və M. İbrahimovdan üzr istəməli, təkzib verməlidir.
İclasda Biləcəri bələdiyyəsinin sədr müavini Ərəstun Kərimovun «Azərbaycan dünyası brifinq» və «Xəbər xətti» qəzetlərinə qarşı şikayətlərinə də baxılıb.
Komissiya «Xəbər xətti» qəzetində şikayətçi Ə. Kərimov barədə verilən anonsu, mövzunun «Azərbaycan dünyası brifinq»də silsilə şantaj xarakterli yazılarla davamını, həmin sayların zərflə bələdiyyə sədrinin müavininə göndərilməsini «reket» jurnalistikanın təzahür formaları kimi dəyərləndirib.