Media

Ana səhifə

Media

APA və ABŞ-ın “Stratfor” Qlobal Məlumat Şirkəti arasında əməkdaşlıq sazişi imzalanıb

08 oktyabr 2009 12:23 (UTC +04:00)

Sazişdə nəzərdə tutulub ki, hər iki qurum ehtiyac yarandığı təqdirdə informasiya mübadiləsi edəcək, regionda baş verən prosesləri dərindən təhlil etmək məqsədi ilə bir-birinə yardım göstərəcək.

“Stratfor”un direktoru Corc Fridman APA ilə əməkdaşlığın əhəmiyyəti barədə danışaraq qeyd edib ki, “Bu, “Stratfor”a Azərbaycanı və bütövlükdə regionu daha dərindən öyrənmək imkanı verəcək. Amerika mediası regiona az diqqət ayırır və eyni miqdarda da başa düşür. “Stratfor” Azərbaycanın və regionun qlobal sistemin dinamizmini anlamaq çərçivəsində kritik əhəmiyyət kəsb etdiyini bilir. Region ölkələri böyük olmasa da, əhəmiyyətləri çox böyükdür. Bizim üçün APA ilə əməkdaşlıq Azərbaycan reallığını dərindən başa düşmək və bu reallığı dünya üzrə oxucularımıza çatdırmağa şərait yaradacaq”.

APA-nın baş direktoru Vüsalə Mahirqızı da “Stratfor”la əməkdaşlığın agentlik üçün çox əhəmiyyətli olduğunu deyib: “Amerikanın ən mötəbər analitik şirkətlərindən olan, proqnozları həmişə özünü doğruldan, bizim regionda da xüsusi nüfuza malik “Stratfor”la əməkdaşlıq, onların təhlillərindən və informasiyalarından eksklüziv yararlanmaq hüququnu əldə etmək APA üçün böyük uğurdur. Bu, həm də bizə region və Azərbaycan üçün önəmli olan ölkələrlə bağlı dünyanın məşhur beyin mərkəzlərindən birinin nə düşündüyünü, prosesləri necə gördüyünü anlamağa imkan verəcək. Bundan bizim abunəçilərimiz də faydalana biləcək”.

Qeyd edək ki, “Stratfor” Qlobal Məlumat Şirkəti 1996-cı ildə ABŞ Texas ştatının Austin şəhərində tanınmış siyasi alim Corc Fridman tərəfindən yaradılıb və bütün dünyada 2 milyonluq oxucu kütləsinə malikdir. “Stratfor” müstəqil, qeyri-siyasi və siyasi, iqtisadi, hərbi təhlilləri ilə tanınan qurumdur. Şirkətin məhsullarından ABŞ və xarici hökumətlər, qlobal korporasiyalar və fərdi şəxslər faydalanır.

APA 2004-cü ildə Azərbaycanda yaradılıb. Özəl, müstəqil informasiya şirkətidir. Agentlik siyasi, iqtisadi, mədəni və idman xəbərləri, siyasi və iqtisadi mövzuda analizlər hazırlayır. Agentlik xəbərlərini Azərbaycan, rus, ingilis, fransız və ərəb dillərində yayır. Agentliyin abunəçiləri arasında dünyanın məşhur informasiya şirkətləri, diplomatik korpus, yerli iqtisadi şirkətlər, banklar, yazılı və elektron KİV var.

“Stratfor”