Media

Ana səhifə

Media

Azərbaycanda iki jurnalist həbs edilib

08 oktyabr 2009 16:21 (UTC +04:00)

Bu barədə APA-ya Media hüququ İnstitutundan məlumat verilib.

Məlumata görə, bu gün Bakı Apellyasiya Məhkəməsi “Nota” qəzetinin baş redaktoru Sərdar Əlibəylini və qəzetin əməkdaşı Fərəməz Allahverdiyevi qəzetdə dərc olunmuş yazılarına görə 3 ay müddətinə azadlıdan məhrum etmə cəzasına məhkum edib.

Qeyd edək ki, S.Əlibəyli və F.Allahverdiyev “Azadlıq Hərəkatçıları Birliyi”nin rəhbəri Təhmasib Novruzov barəsində yazdıqları məqalələrə görə məhkəməyə veriliblər. Bu ilin iyul ayında Nizami rayon Məhkəməsi S. Əlibəylini Cinayət Məcəlləsinin 148-ci maddəsi ilə təhqirdə, F. Allahverdiyevi isə ağır cinayət törədilməsi ilə bağlı böhtan atmaqda suçlu bilərək 3 ay müddətinə azadlıqdan məhrum edib, “Nota” qəzetinin digər əməkdaşı Ramiz Tağıyevi isə 6 ay müddətinə islah işlərinə cəlb edib. Cəzaların icrası təqsirləndirilən şəxslərin apellyasiya şikayətinə baxılanadək təxirə salınıb. Bu gün Bakı Apellyasiya Məhkəməsi jurnalistlərin şikayətinə baxaraq rədd edib. Jurnalistlər məhkəmə zalında həbs olunaraq saxlanma təcridxanasına aparılıblar.

Media Hüququ İnstitutu hadisə ilə bu gün yaydığı bəyanatında tənqidçi jurnalistlərin yazılarına görə cinayət cəzasına məhkum edilməsini pisləyir, bunu tənqidçi jurnalistikanın qorxudulmasına yönəlik olduqca sərt addım sayır. Qurum jurnalistlərin Cinayət Məcəlləsinin böhtan və təhqirə görə cinayət cəzası nəzərdə tutan üzüqara 147 və 148-ci maddələri ilə məsuliyyətə cəlb olunmasının Azərbaycanın tərəfdar çıxdığı beynəlxalq müqavilələrə zidd olduğunu bildirir, Azərbaycan hökumətini jurnalistləri azadlığa buraxmağa, böhtan və təhqirə görə ağır cinayət cəzası nəzərdə tutan hüquqi konsepsiyaları qabaqcıl Avropa ölçülərinə uyğunlaşdırmağa çağırır.