Media

Ana səhifə

Media

Telekanallar tənqiddən necə nəticə çıxarıb? - SORĞU

Telekanallar tənqiddən necə nəticə çıxarıb? - <font color=red>SORĞU</font>

09 oktyabr 2009 16:54 (UTC +04:00)

Bakı. Kəmalə Quliyeva-APA. Prezident Administrasiyasının rəhbəri Ramiz Mehdiyevin “Azərbaycanın efir məkanı: problemlər və vəzifələr” başlıqlı məqaləsinin doğurduğu rezonansın ardınca Milli Televiziya və Radio Şurası (MTRŞ) telekanallarda və radiolarda milli-mənəvi dəyərlərin qorunması ilə bağlı ciddi monitorinqlərə başladığını elan edib. Artıq bəzi kanallar R. Mehdiyevin sözügedən məqaləsinə reaksiya verərək konkret addımlar atmağa başlayıblar.

Azad Azərbaycan Teleradio Şirkəti (ATV) məqaləyə ilk reaksiya verən telekanal olub. ATV dərhal efirdə olan iki verilişi və online SMS xidmətini bağlayıb və şirkətdə Bədii Şura yaradılmasına qərar verib. Bu gün ATV-də əsasən millət vəkillərindən və tanınmış sənətçilərdən ibarət olan Bədii Şuranın iclası keçirilib. Bədii Şuranın üzvü, millət vəkili Nizami Cəfərovun APA-ya verdiyi məlumat görə, iclasda R. Mehdiyevin məlum məqaləsi və kanalın bundan sonrakı proqram siyasəti müzakirə olunub: “İclasda konkret qərarlar da qəbul olundu. Qərara alındı ki, ATV-nin efirində yayımlanan “Sözüm var” meyxana yarışması dayandırılsın, “Xeyir ola” verişində bəzi düzəlişlər və təkmilləşdirilmələr aparılsın. Mən fikirləşirəm ki, belə Bədii Şuralar digər televiziyalarda da yaradılmalıdır. Televiziyaların efirində belə daxili müzakirələrə böyük ehtiyac var”.

ANS televiziyasının proqramlaşma departamentinin rəisi Rəşad Məmmədov APA-ya bildirib ki, ANS-in efirinin radikal dəyişiklərə məruz qalmasına ehtiyac yoxdur: “ANS-in efirində dəyişikliklərə məruz qala biləcək veriliş yoxdur. ANS TV-nin efirində indiyədək ucuz, aşağı səviyyəli şou verilişlər olmayıb və olmayacaq. Düzdür, bəzən ANS də reytinq ardınca qaçır. Bunu dünyada mövcud olan bütün televiziyalar edir. Amma reytinq dalınca qaçmaq ucuz şou verilişlərin yayılmasına gətirib çıxarmayıb”. R. Məmmədovun sözlərinə görə, Azərbaycan teleməkanında köklü keyfiyyət dəyişikləri yalnız reytinq ölçən təşkilatların bu işə yanaşma tərzləri dəyişəndən sonra mümkün ola bilər. R. Məmmədov müğənni Elnarənin aparıcılığı ilə ANS efirində yayımlanan “El bilir ki” verilişinin yayımının dayanmasına da münasibət bildirib. Onun sözlərinə görə, “El bilir ki” ANS telekanalının deyil, prodakşn şirkətlərindən birinin hazırladığı verilişdir: “ Prodakşn şirkətlərindən biri bu verilişi çəkib ANS-ə təqdim edir. Verilişin efirə getməməsinin səbəbi iki şirkət arasında danışıqların nəticəsidir. Yəni bu sırf istehsalat prosesidir, bunun üçüncü tərəflə bağlılığı yoxdur”.

İctimai Televiziya və Radio Yayımları Şirkətinin (İTV) ictimaiyyətlə əlaqə və monitorinq şöbəsinin müdiri Tahir Məmmədov isə APA-ya bildirib ki, İTV yarandığı gündən milli mənəvi dəyərlərin və milli ənənələrin qorunmasını özünün prioritet istiqamətlərindən biri hesab edib: “Bu gün də həmin siyasət davam etdirilir. Bu siyasəti çoxsaylı tamaşaçı auditoriyası da bəyənir. İndən sonra da bu xətti davam etdirmək şərti ilə proqramların hazırlanmasına daha peşəkar yanaşmanı təmin edəcəyik. Milli maraqlara uyğun proqramları daha keyfiyyətlə hazırlayacağıq”. T. Məmmədovun sözlərinə görə, daim yeni layihələrlə tamaşaçılar qarşısına çıxan İctimai Televiziyanın milli-mənəvi dəyərlərin qorunması ilə bağlı yeni layihələr və proqramlar da təqdim edəcəyi istisna deyil.

“Xəzər” televiziyasının proqram departamentinin baş koordinatoru Billurə Əmirova isə APA-ya bildirib ki, R. Mehdiyevin sözügedən məqaləsindən sonra məqalədə adı çəkilən və televiziyanın efirində yayımlanan “Mix şou” verilişi bağlanılıb: “Digər verilişlərlə bağlı da daha diqqətli olacağıq. Son iradlardan sonra əlbəttə aparıcılardan həm öz səviyyələrini qaldırmaq, , həm də verilişlərinə çağırdıqları qonaqları daha diqqətlə seçmək tələb olunacaq. Onsuz da “Xəzər”in efirində əyləncəli verilişlərin sayı azdır. Biz daha çox maarifləndirici verilişlərə üstünlük veririk. Əyləncəli verilişlərin özləri də müəyyən çərçivələrlə efirə verilir”. B. Əmirovanın sözlərinə görə, ”Xəzər” yarandığı gündən reytinq ardınca qaçmağı qarşısına məqsəd qoymayıb: “Bizim kanalın efirində heç zaman açıq-saçıq səhnələr, açıq-saçıq geyimlər görməzsiniz. Hətta efirə verilən filmlərdə belə səhnələr olduqda biz həmin səhnələri çıxarırıq”. B. Əmirova bildirib ki, Xəzər TV-nin tabeliyində olan Burc FM radiosunun fəaliyyət xəttində də qeyri-adi bir şey yoxdur: “Radio kifayət qədər milli-mənəvi dəyərlərə sayğı nümayiş etdirir”.

“Space” telekanalının icraçı direktoru Kamil Şahverdiyev isə APA-ya bildirib ki, təmsil etdiyi televiziya əyləncəli verilişlərin sayına digər telekanallardan geridə qalır: “Ona görə də “Space”in efirində köklü dəyişiklər nəzərdə tutulmur”. K. Şahverdiyev geniş açıqlamanı MTRŞ-nın oktyabrın 13-də ölkədə fəaliyyət göstərən bütün telekanalların rəhbərləri ilə birgə milli-mənəvi dəyərlər mövzusunda aparacağı müzakirələrdən sonra verə biləcəyini deyib.