Media

Ana səhifə

Media

Elnur Baimov: “Missiyamız Azərbaycan barədə xəbərləri xaricə yaymaqdır” - MÜSAHİBƏ

Elnur Baimov: “Missiyamız Azərbaycan barədə xəbərləri xaricə yaymaqdır” - <font color=red>MÜSAHİBƏ</font>

26 oktyabr 2009 13:51 (UTC +04:00)

- Azərbaycanda ingilis dilində xəbər portalı yaratmağınızın səbəbi nədir?

- “Taym” jurnalının baş redaktorunun bir sözü var ki, XXI əsrdə informasiya lazım olandan çoxdur və əsas çətinlik bu informasiya bolluğunda oxucuya lazım olanı təqdim etməkdir. Azərbaycanda ingilis dilində bir neçə agentlik xəbər yayır. Amma mənim fikrimcə, o xəbərlər qərb oxucusunun öyrəşdiyi formatda təqdim olunmur. Ona görə də biz belə bir işə başladıq, bu saytı yaratdıq ki, orada qərb oxucusuna adət etdiyi formada Azərbaycan və region barədə əsas xəbərləri yayaq.

- Sizin saytda hansı tipli xəbərlərə üstünlük veriləcək?

- Bizdə əsas xəbərlər Azərbaycanla bağlı olacaq. Şou-biznes xəbərləri olmayacaq. İqtisadi, ictimai və siyasi xəbərlər yayılacaq, bölgədə Ermənistan, Gürcüstan, Türkiyə, İran və Rusiya ilə bağlı xəbərlər yayacağıq.

- Portalın kollektivi tam formalaşıbmı?

- Bəli, kollektiv yığmışıq. Hazırda 10 nəfərdən ibarət heyətimiz var. Onların bir hissəsi əcnəbilərdir, vaxtilə xarici media vasitələrində işləyiblər. Onlar bizə kömək edirlər ki, iş standartlarımızı beynəlxalq xəbər saytlarının səviyyəsinə qaldıraq. İkincisi də, onlar ingilisdilli olduğu üçün bizim xəbərləri özlərinin öyrəndiyi formaya salırlar. Yəni onlar dilin üzərində də işləyir. Azərbaycanlı əməkdaşların isə peşəkar səviyyədə formalaşmasına yardım edirlər.

- Peşəkarlığın dünya səviyyəsinə qaldırıldığını bildirirsiniz, bəs işçilərin əməkhaqqı necə, dünya standartlarına uyğun olacaqmı?

- Azərbaycan üzrə biz yaxşı maaş veririk. Yəni bir neçə işçimiz başqa media qurumlarından bizə transfer olunublar, bunu nəzərə alırıq.

- Saytın siyasi mövqeyi necə olacaq?

- Mən çalışıram ki, siyasətdən uzaq durum. Mövqeyim də hər kəsə bəllidir, nə iqtidar, nə də müxalifətçiyəm. Bu biznes layihədir və biz bütün siyasi qüvvələrlə əməkdaşlıq etməyə hazırıq və edirik.

- Portalın Azərbaycan dilli bölməsi olacaqmı?

- Azərbaycan bölməsi yoxdur. Biz öz missiyamızı Azərbaycan barədə xəbərləri xaricə yaymaqda görürük.

- Tanınmış jurnalistlərdən kimlər sizinlə əməkdaşlıq edəcək?

- Bəzi jurnalistlər özlərini brend kimi adlandırırlar və biz belə şeylərdən uzaq dururuq. Ona görə də biz tanınmış və yaxud tanınmamış jurnalist bölgüsü aparmırıq. İş prinsipimiz belə deyil.

- Saytın perspektivini necə görürsünüz?

- Perspektiv odur ki, qərb auditoriyası üçün Azərbaycan barəsində yayılan xəbərlərin ən aparıcı mənbələrindən biri olaq. Biz saytda video müsahibələr də yerləşdiririk. Bu saytla bir yerdə biz muğam radiosu saytını da açmışıq. Çoxlu fotolar yerləşdiririk. Yəni aktual, heç kimin maraqlarını tapdamayan, tərəf tutmadan xəbərlərin yayılması bizim əsas missiyamızdır.

- Şou - biznes xəbəri yaymaq istəməməyinizin səbəbi nədir?

- Azərbaycanın daxili bazarında şou-biznes xəbərləri artıq lazım olandan çoxdur. Bu çox neqativ bir haldır. Xaricilərin isə ümumiyyətlə bizim şou-bizneslə bağlı heç bir marağı yoxdur. Çünki bizdə şou-biznes çox səviyyəsizdir. Hazırda caz festivalı gedir və biz bu xəbəri yayırıq, həmin xəbər də çox oxunur. Amma Aygün Kazımova ilə bağlı xəbər yerləşdirsək də, bu hansısa xariciyə lazım deyil. Biz də vaxtımızı boşuna sərf etmək istəmirik.

- Portalın təsisçisi kimdir?

- Portalın sahibi də, təsisçisi də, baş redaktoru da mənəm.