Media

Ana səhifə

Media

Mətbuat Şurası Mətbuat Nizamnaməsinin 90 illiyini qeyd edib

30 oktyabr 2009 14:12 (UTC +04:00)

Bakı-APA. Azərbaycan Mətbuat Şurasının (MŞ) təşəbbüsü ilə «Mətbuat Nizamnaməsi 90: keçmişdən bu günə dəyişən reallıqlar» mövzusunda dəyirmi masa keçirilib. Tədbiri giriş sözü ilə açan MŞ sədri Əflatun Amaşov Azərbaycan Xalq Cümhuriyyəti (AXC) dönəmində qəbul olunmuş Mətbuat Nizamnaməsinin 90 illiyi ilə bağlı ölkənin bir sıra tədris müəssisələrində mərasimlərin keçirildiyinə diqqət çəkib. Nizamnamədə əksini tapan prinsiplərlə bağlı məlumat verən Şura sədri sənədin müasir dövrümüz üçün də aktual səciyyə daşıdığını vurğulayıb.

BDU-nun jurnalistika fakültəsinin mətbuat tarixi kafedrasının müdiri, professor Şamil Vəliyev AXC dövründə qəbul olunmuş sənədi mühüm tarixi zərurət kimi dəyərləndirib. Onun sözlərinə görə, XX əsrin əvvəllərindən başlayaraq çar Rusiyası daxilində baş verən ictimai-siyasi proseslər söz və mətbuat azadlığına da təsir göstərmişdi.

BDU-nun jurnalistika fakültəsinin professoru Cahangir Məmmədli çıxışında diqqəti Azərbaycanın ikinci dəfə müstəqilliyini əldə etdiyi 1991-ci ildə baş verən proseslərə yönəldib. Onun sözlərinə görə, həmin vaxt Azərbaycan jurnalistləri məhz bu Nizamnaməyə güvəniblər və ona istinad ediblər.

Mətbuat Şurası İdarə Heyətinin üzvü, «Azərbaycan» qəzetinin baş redaktoru Bəxtiyar Sadıqov Mətbuat Nizamnaməsinin KİV sahəsindəki mövcud qanunvericilik aktları üçün başlıca mənbə rolu oynadığını vurğulayıb: «Diqqət yetirsəniz, Mətbuat Şurasının Nizamnaməsinin, həmçinin ölkə jurnalistlərinin I qurultayında qəbul olunmuş Azərbaycan Jurnalistlərinin Peşə Davranışı Qaydalarının müxtəlif prinsip və bəndlərində Xalq Cümhuriyyəti dövründə ərsəyə gəlmiş bu mühüm sənədə kifayət qədər istinad edilib».

BDU-nun dosenti Nəsiman Yaqublu bildirib ki, Mətbuat Nizamnaməsinin meydana çıxması cümhuriyyət dövrü istiqlal bəyannaməsinin 4-cü bəndindən irəli gəlib. Həmin vaxtadək görkəmli mütəfəkkirlərin çıxışlarında söz və mətbuat azadlığı ilə bağlı geniş məqamlar yer alıb: “Sənəd məhz onların fikirlərinin məhsulu kimi böyük əhəmiyyətə malikdir”.

«Bakı xəbər» qəzetinin baş redaktoru Aydın Quliyev çıxışında həmin vaxtadək Şərqdə belə bir Nizamnamənin mövcud olmadığını deyib. Sənədin mütərəqqi xüsusiyyətlərindən söz açan baş redaktor onun yenidən çap edilməsi və yayılması təklifini irəli sürüb.

«Xalq cəbhəsi» qəzetinin baş redaktoru Elçin Mirzəbəyli Mətbuat Nizamnaməsində əksini tapan məsələlərin sonradan qardaş Türkiyə Cümhuriyyətindəki analoji sənədlərdə də özünə geniş yer tapdığını vurğulayıb.

Çıxış edənlərdən MŞ İdarə Heyətinin üzvləri Azərbaycan Respublikasının Prezidenti Yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli, «İki sahil» qəzetinin baş redaktoru Vüqar Rəhimzadə, Beynəlxalq Avrasiya Mətbuat Fondunun sədri Umud Rəhimoğlu, Jurnalistlərin Həmkarlar İttifaqının sədri Müşfiq Ələsgərli, «Paralel» qəzetinin baş redaktoru Tapdıq Abbas, «Səs» qəzetinin baş redaktoru Bəhruz Quliyev, «Xalq qəzeti»nin baş redaktor müavini Tahir Aydınoğlu Mətbuat Nizamnaməsinin müasir dövr üçün də aktual səciyyə daşıyan xüsusiyyətlərini təhlil ediblər.