Media

Ana səhifə

Media

Mətbuat Şurasında Penitensiar Xidmətin ictimaiyyətlə əlaqələr şöbəsinin rəhbəri ilə jurnalistlərin görüşü keçirilib

17 noyabr 2009 15:11 (UTC +04:00)

Bakı. Hafiz Heydərov – APA. Azərbaycan Mətbuat Şurası dövlət qurumlarının mətbuat xidmətləri ilə jurnalistlərin görüşünü təşkil etməyə başlayıb. APA-nın məlumatına görə, şurada Ədliyyə Nazirliyinin Penitensiar Xidmətinin ictimaiyyətlə əlaqələr şöbəsinin rəhbərliyinin jurnalistlərlə görüşü keçirilib. Tədbiri giriş sözü ilə açan Mətbuat Şurasının sədri Əflatun Amaşov görüşlərin mətbuatla hakimiyyət qurumları arasında münasibətlərin yaxşılaşmasına xidmət edəcəyini vurğulayıb.

Daha sonra çıxış edən Penitensiar Xidmətin ictimaiyyətlə əlaqələr şöbəsinin rəhbəri Mehman Sadıqov təmsil etdiyi qurumun iki ildən artıqdır fəaliyyət göstərdiyini, bu müddət ərzində kütləvi informasiya vasitələri ilə geniş əməkdaşlıq etdiklərini deyib. Son illər Penitensiar Xidmətdə köklü islahatlar həyata keçirildiyinə diqqət çəkən M. Sadıqov, bu işlərin mətbuat vasitəsilə geniş ictimaiyyətə çatdırıldığını söyləyib. O, bəzi mətbuat orqanlarında Penitensiar Xidmətin müxtəlif cəzaçəkmə müəssisələri, habelə orada saxlanılan məhbuslarla bağlı həqiqətə uyğun olmayan informasiyaların yayıldığını bildirib.

Tədbirdə iştirak edən hüquq müdafiəçisi Səidə Qocamanlı isə Penitensiar Xidmətin ümumi fəaliyyətindən razı qaldığını dilə gətirib. Tez-tez cəzaçəkmə müəssisələrində monitorinqlər həyata keçirdiklərini qeyd edən hüquq müdafiəçisi bəzi müəssisələrdə neqatib halların olduğunu da gizlətməyib. S. Qocamanlı həbsdə olan jurnalistlər barədə də danışıb: “Biz həbsdə olan jurnalistlərlə tez-tez görüşürük. Müşfiq Hüseynovun vəziyyəti olduqca ağırdır. Biz onun xəstəliyi ilə əlaqədar əfv olunması üçün ölkə başçısına müraciət etmişik. Ümidvarıq ki, müraciətimiz müsbət həllini tapacaq”.

Tədbirin sonunda Penitensiar Xidmətin ictimaiyyətlə əlaqələr şöbəsinin rəhbəri M. Sadıqov jurnalistləri maraqlandıran sualları cavablandırıb.