Media

Ana səhifə

Media

APA ilə Qazaxıstanın “Nur media” mediaholdinqi arasında əməkdaşlıq haqqında müqavilə imzalanıb

23 noyabr 2009 15:07 (UTC +04:00)

APA-nın xəbərinə görə, imzalanma mərasimi Qazaxıstanın Astana şəhərində “Nur media” mediaholdinqinin dəvəti ilə baş tutub. Müqaviləni APA-nın baş direktoru Vüsalə Mahirqızı və “Nur media”nın baş direktoru Armanjan Baytasov imzalayıb. İmzalanma mərasimində “APA-Economics”in baş redaktoru Vüqar Mustafayev və “Nur media”nın baş direktorunun birinci müavini Askar Umarov da iştirak ediblər.

İmzalanma mərasimindən sonra brifinq olub.

Vüsalə Mahirqızı brifinqdə türkdilli ölkələrdən birinin önəmli media holdinqi ilə müqavilə imzalanmasını önəmli hadisə adlandırıb. APA-nın baş direktoru qeyd edib ki, “Nur media” və APA-nın birgə şəbəkə yaradaraq, türkdilli ölkələrin media qurumları arasında qarşılıqlı əməkdaşlıq müqavilələrinin imzalanması müsbət hal olardı. “Nur media”nın baş direktoru da bu təklifi müsbət qəbul etdiyini açıqlayıb.

V. Mahirqızı daha sonra APA-nın yaranması barədə danışıb. Agentliyin 2004-cü il noyabrın 16-da fəaliyyətə başladığını qeyd edən baş direktor APA-nın Azərbaycan, rus, ingilis, ərəb və fransız dillərində gündəlik 450-500 xəbər yaydığını deyib. Xəbər xidməti xüsusi bülletenlər və “on-line” sistemi ilə həyata keçirilir. İnformasiya bloklarında Azərbaycanın siyasi, iqtisadi, sosial, mədəni və idman həyatına dair məlumatlar, regionda və dünyada baş verən hadisələrlə bağlı operativ xəbərlər əksini tapır. Agentlik həftənin bütün günləri hər beş dildə ümumi, iqtisadi, foto və video buraxılışları, ayda iki dəfə olmaqla iqtisadi və siyasi analitika bülletenləri hazırlayır. Operativ, dəqiq, tərəfsiz informasiya siyasəti yürüdən APA Türkiyə, Yaxın Şərq, Rusiya, Ukrayna, Gürcüstan, Mərkəzi Asiya respublikaları, Baltikyanı ölkələr, Moldova, Avropa dövlətləri və ABŞ-ın aparıcı kütləvi informasiya vasitələri, telekanallar, elektron yayım quruluşları və mətbuat orqanları ilə əməkdaşlıq edir. Adı çəkilən dövlətlərin bir sıra yayım quruluşları ilə əldə olunan əməkdaşlıq haqda razılaşmaya əsasən bu qurumlarla informasiya mübadiləsi aparılır. APA-nın müştəriləri arasında Azərbaycanda fəaliyyət göstərən xarici səfirlik və konsulluqlar, diplomatik missiyalar, beynəlxalq təşkilatların təmsilçilikləri, dövlət strukturları, nazirliklər, maliyyə qurumları, beynəlxalq maliyyə təşkilatlarının nümayəndəlikləri, xarici şirkətlər, yerli və xarici biznes strukturları da var. Azərbaycanda nəşr olunan və yayımlanan 150-dən çox kütləvi informasiya vasitəsi APA-nın abunəçisidir. Abunəçilər sırasında ölkənin aparıcı iqtidar və müxalifət mətbuatı, müstəqil media qurumları üstünlük təşkil edir. Agentliyin www.apa.az, www.apasport.az, www.photo.apa.az ünvanlı internet saytları fəaliyyət göstərir. Bundan başqa, APA-nın gündəlik xəbərlərini mobil telefon vasitəsilə http://wap.apa.az ünvanından da oxumaq mümkündür. APA-nın Azərbaycanın bütün bölgələrində, həmçinin Türkiyə, Yaxın Şərq, Rusiya, Gürcüstan, Mərkəzi Asiya, Fransa və ABŞ-da ofisləri fəaliyyət göstərir.

150-dək əməkdaşı olan agentlik Avropa Şurasında, Dövlət Departamentində, Rusiya XİN-də rəsmi qeydiyyatdan keçib. APA dünyanın bir çox analitik mərkəzləri, o cümlədən “Stratfor” Qlobal Məlumat Şirkəti ilə əməkdaşlıq edir.

V. Mahirqızı, həmçinin Azərbaycan mediası, ölkənin iqtisadiyyatının indiki durumu barədə məlumat verib.

A. Baytasov isə rəhbəri olduğu qurumun yaranması, fəaliyyəti, Qazaxıstan mətbuatının indiki durumu barədə danışıb.

Qeyd olunub ki, “Nur media” Məhdud Məsuliyyətli Cəmiyyəti ötən il noyabrın 24-də “Nur Otan” Xalq-Demokratik Partiyasının təşəbbüsü ilə yaradılıb. 900 işçisi olan holdinqin tərkibinə 1 telekanal, 2 radiostansiya və 8 qəzet daxildir. “Strana i mir”, “Dala men kala”, “Aykın”, “Liter”, “Türkistan”, “Nur Astana”, “İzvestiya-Qazaxıstan”, “Qazaxıstan temirjolşısı” qəzetlərinin ümumi tirajı 440 min nüsxədir. Bundan başqa, holdinqin tərkibinə bütün ölkə ərazisinə yayımlanan “Astana” telekanalı, “NS” radiostansiyası və FM tezliyində yayımlanan “Delovaya volna” radiosu daxildir. “Nur Media”nın prioritet məqsədləri Qazaxıstanın siyasi, iqtisadi və mədəni həyatına dair obyektiv informasiyalar yaymaq, sosialyönümlü layihələrdə iştirak etməkdir.