Media

Ana səhifə

Media

“RUH” dövlət qurumları, idarə və müəssisələr arasında keçirilən sorğunun nəticələrini açıqlayıb

02 dekabr 2009 12:24 (UTC +04:00)

Bakı-APA. “RUH” Azərbaycan Jurnalistlərinin Müdafiə Komitəsi (AJMK) «Diffamasiya haqqında qanunun qəbulunda ictimai təşəbbüslərin rolu» layihəsi üzrə nazirliklər, dövlət qurumları, idarə, müəssisə və təşkilatlar arasında noyabr ayında keçirilən sorğunun nəticələrini açıqlayıb. Qurumdan APA-ya verilən məlumata görə, sorğuda müxtəlif qurumlardan 500-dək respondentin iştirakı təmin olunub. Sorğu anonim xarakter daşıyıb.

“Azərbaycan Cinayət Məcəlləsində jurnalistin yazdığı yazıya görə azadlıqdan məhrum edilməsini nəzərdə tutan maddələrin mövcudluğuna münasibətiniz necədir” sualına cavabda rəyi soruşulanların 67 faizinin qənaətincə, Cinayət Məcəlləsində jurnalistlərin yazdıqları yazılara görə azadlıqdan məhrum edilməsini nəzərdə tutan müddəaların mövcudluğu müsbət haldır.
“Cinayət Məcəlləsində jurnalistin yazdığı yazıya görə cəzalandırılması ilə bağlı nəzərdə tutulan tədbirlərlə razısınızmı” sualına cavabda rəyi soruşulanların 37 faizi belə hesab edir ki, jurnalistlərin yazdıqları yazılara görə cəzalandırılması ilə bağlı nəzərdə tutulan tədbirlər hazırkı dövr üçün tam yetərli səciyyə daşıyır.
“KİV-də barənizdə gedən böhtana, təhqirə qarşı hansı tədbirləri görərdiniz” sualına cavabda məhkəməyə müraciət etməyə üstünlük verdiklərini söyləyənlər 32 faiz təşkil edir.
Onlar bu yolla KİV-in və material müəllifinin qanuna müvafiq qaydada cəzalandırılmasının vacibliyini vurğulayırlar. 31 faiz məsələnin media müstəvisində həllinə önəm verir. Belə düşünənlər Mətbuat Şurasının son illərdəki fəaliyyətinin, xüsusən ictimai qınaq xarakterli tədbirlərinin əhəmiyyətini vurğulayaraq həmin fəaliyyətin mediada təhqir və böhtanların azalmasında həlledici rol oynadığını önə çəkirlər.

Respondentlərin 15 faizi düşünür ki, jurnalistin təhqir və böhtan yazması yolverilməz və bağışlanılmazdır. Amma onun bunu hansısa kənar amillərin təsiri ilə etməsi də mümkündür. Buna görə də məsələni araşdırmaq üçün redaksiya və müəlliflə əlaqə yaratmaq, problemi aradan qaldırmaq zəruridir. Yaranmış narazılığını mərhələli şəkildə aradan qaldırmağa üstünlük verən bu respondent qrupu redaksiya və müəlliflə söhbətləşmədən nəticə hasil olunmadığı təqdirdə əvvəlcə Mətbuat Şurasına, sonra isə məhkəməyə müraciət etməyi vacib sayır.

Rəyi soruşulanların 22 faizinin düşüncəsinə görə, hazırkı dövrdə KİV-in və ya jurnalistin təhqiramiz material dərc etməsi adi hal alıb.

“KİV-də barənizdə gedən təhqir və böhtana görə məhkəməyə müraciət etsəydiniz, nə tələb edərdiniz?” sualına cavabda isə müəllifin azadlıqdan məhrum edilməsinin vacibliyini vurğulayanlar 23 faiz təşkil edib. Bu respondent qrupu belə düşünür ki, insana, vətəndaşa, vəzifəsindən və cəmiyyətdə tutduğu mövqedən asılı olmayaraq hər hansı şəxsə böhtan atılması və onun təhqir olunması jurnalistin yol verdiyi ən qorxunc haldır.

Qeyd edək ki, «RUH» AJMK layihəni Azərbaycan Respublikasının Prezidenti Yanında Kütləvi İnformasiya Vasitələrinin İnkişafına Dövlət Dəstəyi Fondunun maliyyə dəstəyi ilə həyata keçirir.