Media

Ana səhifə

Media

Xocalı faciəsi ilə bağlı yazı müsabiqəsinə start verilib

03 dekabr 2009 11:31 (UTC +04:00)

Bakı. Elnur Məmmədli – APA. Azərbaycan Mətbuat Şurası və “Xocalı Soyqırımını Tanıtma” İctimai Birliyi Xocalı soyqırımı ilə bağlı jurnalistlərin yazı müsabiqəsinə start verib. APA-nın məlumatına görə, bununla bağlı keçirilən mətbuat konfransında Mətbuat Şurasının sədri Əflatun Amaşov bildirib ki, Azərbaycan mediası Qarabağ həqiqətlərinin və Xocalı soyqırımının təbliğinə hər zaman yer ayırıb. Müsabiqənin keçirilməsində məqsədin soyqırımın ildönümü ərəfəsində faciənin bir daha dünya ictimaiyyətinin diqqətinə çatdırılması olduğunu deyən Ə. Amaşov müsabiqə qaliblərinin mükafatlandırılacağını deyib.

Müsabiqədə iştirak etmək istəyən jurnalistlər Xocalı soyqırımı mövzusunda hazırladıqları materialları fevralın 5-dək Mətbuat Şurasına çap və elektron formata təqdim edə bilərlər.

Ə. Amaşov bildirib ki, xarici mətbuatda soyqırımının təbliğində yaxından iştirak edən mətbuat nümayəndələrinə də mükafatlar nəzərdə tutulub. O, şuraya təqdim olunmuş materiallarının münsiflər heyəti tərəfindən qiymətləndiriləcəyini və ildönümü ərəfəsində qaliblərin mükafatlandırılacağını deyib.
“Xocalı Soyqırımını Tanıtma” İctimai Birliyinin sədri Şamil Sabiroğlu isə bildirib ki, müsabiqənin təşkili ilə bağlı xərclər “Azərsun Holdiq” tərəfindən maliyyələşdiriləcək. Müsabiqədə birinci yerin qalibinə 1000 AZN (1 nəfər), 2 yerin qalibinə 650 AZN (2 nəfər), üçüncü yeri tutanlara isə 300 AZN (3 nəfər) mükafat təqdim olunacaq.
“Azərsun Holdinq”-in ictimaiyyətlə əlaqələr şöbəsinin əməkdaşı Afiq Səfərov deyib ki, qaliblər müəyyənləşərkən faciənin mahiyyətini açan yazılara üstünlük veriləcək.